Hukuncin Sujudus-Tilawa Da Sujudus-Shukur

𝐓𝐀𝐌𝐁𝐀𝐘𝐀❓

Assalamu alaikum warahmatullahi wabarakatuh Malam Ina wuni ya ayyuka Allah yadafa🤲 Malam dan Allah ina so a koya min yadda ake sujudut tilawa da abin da ake karantawa a cikin ta dakuma yadda ake sujush-shukuri da abin da ake karantawa a cikin ta sannan ko mutum ba shi da alwala zai iya kuma idan mace ce ko babu hijabi a jikinta za ta iya yi. Allah ya karawa malam lpy da nisan kwana masu al'barkah🤲

𝐀𝐌𝐒𝐀❗️

Wa'alaikumun salamu warahamatullah,

Sujudus-tilawa ita ce sujjadar da ake yi idan mutum ya karanta ko ya saurari ayar Alƙur’ani da ta ƙunshi wurin sujjada. Wannan sujjada ce ta Sunnah, ba farilla bace. Idan mutum ya karanta ayar sujjada, yana da kyau ya yi sujjada, kuma idan bai yi ba, babu zunubi a kan sa. Haka nan idan yana cikin sallah, idan ya karanta ayar sujada, zai iyayin sujadar tilawa sannan ya cigaba da sallarsa.

Idan za a yi sujudus-tilawa, ana cewa ALLAHU AKBAR yayin saukowa zuwa sujjada, sannan a yi sujada guda ɗaya. Babu wani takamaiman zikiri da aka wajabta kawai saboda sujudus-tilawa, amma daga cikin addu’ar da aka ruwaito daga Annabi (SAW) akwai

سَجَدَ وَجْهِيَ لِلَّذِي خَلَقَهُ وَشَقَّ سَمْعَهُ وَبَصَرَهُ بِحَوْلِهِ وَقُوَّتِهِ

Ma’ana: “Fuskata tayj sujada ga Wanda Ya halicce ta, Ya buɗe mata ji da gani da ikonsa da ƙarfinsa.” An ruwaito wannan addu’ar a hadisin Sujadar Tilawa, a Sunan at-Tirmidhi (3425) da Abu Dawud (1414), kuma malamai sun inganta isnadinsa.

Haka kuma mutum zai iyayin tasbihi da addu’a irin ta sujada, kamar SUBHANA RABBIYAL-A‘LA, domin Annabi (SAW) ya ce: “An sanya ni yin sujada, saboda haka ku yawaita addu’a a cikinta, domin yafi dacewa a amsa muku.” (Sahihul Muslim, 482).

Game da sujudus-shukur, ita ce sujjadar godiya da mutum yake yi idan Allah Ya bashi wata babbar ni’ima, ko Ya kawar masa da wata musiba, ko ya samu wani abin farin ciki da ya dace a gode wa Allah a kansa. Misali, mutum ya yi aure ko Allah Ya ceci shi daga wani hatsari, ko ya samu wani babban alheri. Ana yin sujada guda ɗaya domin gode wa Allah.

Babu wata addu’a guda da aka wajabta musamman a sujudus-shukur. Mutum zai iya cewa SUBHANA RABBIYAL-A‘LA, ya gode wa Allah, ya kuma yi addu’ar duk abin da yake so. Ana iya cewa

الْحَمْدُ لِلَّهِ رَبِّ الْعَالَمِينَ، اللَّهُمَّ لَكَ الْحَمْدُ وَالشُّكْرُ عَلَى نِعَمِكَ

Ma’ana: Godiya ta tabbata ga Allah, Ubangijin talikai. Ya Allah, yabo da godiya gare Ka saboda ni’imominKa.”

Amma game da alwala, akwai ɗan saɓanin fahimtar malamai. Mafi yawan malamai sun ce sujudus-tilawa da sujudus-shukur suna da hukuncin sujjada irin ta sallah wajen buƙatar alwala, sutura da fuskantar alƙibla. Saboda haka, idan mutum yana da damar yin alwala, ya yi alwala sannan ya yi sujjadar. Amma akwai wasu malamai, ciki har da wasu daga cikin malamai na farko da Ibn Taymiyyah da Ibn al-Ƙayyim suka zaɓa, waɗanda suka ce ba lallai ba ne alwala ko suturar sallah saboda sujudar ba sallah bace. Wannan ra’ayi yana da ƙarfi musamman idan mutum ya gamu da dalilin sujjada ba tare da alwala ba. Don haka, wanda bashi da alwala zai iyayin sujudus-tilawa ko sujudus-shukur bisa wannan ra’ayi mai ƙarfi, amma idan zai iyayin alwala ba tare da wahala ba, yin alwala yafi fita daga saɓanin malamai.

Sannan Game da mace, idan za ta yi sujjada a gaban mutanen da ba mahram ba, dole ne ta rufe jikinta kamar yadda ake buƙata wajen sallah. Amma idan tana keɓe a gida ko a wurin da babu namijin da ba muhanrami ba, babu dalilin da zai hana ta yin sujudus-tilawa ko sujudus-shukur ba tare da hijabin sallah ba, musamman bisa ra’ayin malamai da suka ɗauki wannan sujada ba ta da hukuncin sallah. Idan kuma za ta yi ta cikin yana yin da ake buƙatar sutura, to ta rufe jikinta domin kiyaye ladabi da fita daga saɓanin malamai.

Ataƙaice sujudus-tilawa sujjada ce guda ɗaya da ake yi saboda karanta ko sauraron ayar sujada; sujudus-shukur kuma sujada ce guda ɗaya da ake yi domin gode wa Allah saboda wata ni’ima ko kawar da wata musiba. Ba a yin tahiyya ko sallama a cikinsu kamar sallar nafila. Ana iyayin addu’a a cikinsu, kuma babu takamaiman addu’a guda da ta zama wajibi. Idan mutum yana da alwala da sutura, wannan shi ne mafi aminci kuma yafi dacewa. Amma rashin alwala baya hana yin sujjada bisa ra’ayin wasu malamai masu ƙarfi.

Allah Maɗaukakin Sarki Ya ce:

يٰۤـاَيُّهَا الَّذِيۡنَ اٰمَنُوۡا ارۡكَعُوۡا وَاسۡجُدُوۡا وَ اعۡبُدُوۡا رَبَّكُمۡ وَافۡعَلُوۡا الۡخَيۡرَ لَعَلَّكُمۡ تُفۡلِحُوۡنَ۩ ۚ‏

Yã kũ waɗanda suka yi ĩmãni! Ku yi rukũ'i, kuma ku yi sujada, kuma ku bauta wa Ubangijinku, kuma ku aikata alhẽri, tsammãninku, ku sami babban rabo. (Suratul-Hajj ayata 77).

Allah Yasa mu kasance daga cikin masu yawan gode masa da masu bin Sunnah yadda ya kamata.

WALLAHU A'ALAM

Zauren Fatawoyi Bisa Alkur'ani Da Sunnah.

 ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.