Hukuncin Namijin Da Yake Yin Sallar Asuba A Gida

TAMBAYA❓

As-salamu alaykum Allah ya karɓa malan lafiya da nisan kwana dan Allah. Malam ina tambaya mene ne hukuncin wanda baya zuwa sallar asuba yake yi a gida tare da matarsa na gode

AMSA:‼️

Wa alaikumus salam wa rahmatullahi wa barakatuhu.

Namiji wanda yake da lafiya kuma bashi da wani uzuri na shari'a, bai kamata ya riƙa yin sallar Asuba a gida tare da matarsa ba alhali yana da ikon zuwa masallaci. Malamai sun saɓa dangane da hukuncin sallar jam'i a masallaci, inda wasu suka ce wajibi ne, wasu kuma suka ce sunnah ce mai ƙarfi.

An ruwaito daga Abu Hurairah رضي الله عنه cewa wani makaho ya zo wurin Annabi (SAW) ya ce: “Ya Manzon Allah, bani da wanda zai riƙa jagorantar ni zuwa masallaci. Sai ya nemi izinin yin sallah a gidansa, Annabi (SAW) ya bashi izini. Amma lokacin da ya juya zai tafi, sai Annabi (SAW) ya kira shi ya ce masa:

هَلْ تَسْمَعُ النِّدَاءَ بِالصَّلَاةِ؟ قَالَ نَعَمْ، قَالَ فَأَجِبْ

Ma'ana: Kana jin kiran sallah? Ya ce: “Eh.” Sai Annabi (SAW) ya ce: “To, ka amsa kiran.” (Sahihul Muslim, hadisi na 653).

Wannan hadisi yana daga cikin hujjojin malamai waɗanda suke ganin wajibi ne namiji ya halarci sallar jam'i a masallaci idan zai iya, har ma da wanda yake da nakasa idan yana iya zuwa ba tare da wahala ko cutarwa ba.

Haka kuma Annabi (SAW) ya ce: “Sallar jam'i tafi sallar mutum shi kaɗai da darajoji ashirin da bakwai.” (Sahihul Bukhari, hadisi na 645; Sahih Muslim, hadisi na 650).

Saboda haka, idan mutum yana da lafiya kuma babu uzuri, ya riƙa zuwa masallaci domin samun falalar sallar jam'i da kauce wa saɓawa ga umarnin Annabi ﷺ. Idan kuma ya yi sallah tare da matarsa a gida, sallarsu tana iya inganta idan sun cika sharuɗɗan sallah, amma hakan baya kawar da laifin barin jam'i a masallaci bisa ra'ayin malamai waɗanda suke ganin wajibi ne.

A ƙarshe, ina nasiha ga dukkanmu damu ji tsoron Allah, mu kiyaye sallolinmu, musamman sallar Asuba, mu riƙa halartar masallaci idan mutun nada iko haka. Kada mutum ya mayar da gida wurin yin sallolin farilla kawai saboda kasala, alhali masallaci yana kusa kuma babu wani uzuri.

Allah Ya samu kasance cikin waɗanda suke kiyaye sallolinsu kuma suke bin Sunnah ta Annabi ﷺ.

WALLAHU TA'ALA A'ALAM

Zauren Fatawoyi Bisa Alkur'ani Da Sunnah.

 ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.