Hukuncin Jinin Haila Da Ya Taba Tufafin Sallah

𝐓𝐀𝐌𝐁𝐀𝐘𝐀❓

Assalamu alaikum Allah ya karawa malam lafiya tambayata ita ce. A littafin Zaduzzaujain akwai hadith ɗin da yake magana a kan idan mace ta yi jini sai ya taɓa tufafinta za ta fara kankarewa sai tas a ruwa ta dirza da yan yatsunta koh malam?

Tom idan ya kasance ba ta yi hakan ba kawai wankewa ta yi, to kuma sai ta yi sallah da shi ya matsayin sallar tata take?

HUKUNCIN JININ HAILA DA YA TAƁA TUFAR SALLAH

𝐀𝐌𝐒𝐀❗️

Wa'alaikumun salamu warahamatullah,

Yar'uwa Hadisin da kika amba ta shi ne hadisin Asma'u bint Abi Bakr (RA), wanda Bukhari (227) da Muslim (291) suka ruwaito. Wata mace ta tambayi Annabi (Sallallahu Alaihi Wasallam) game da jinin haila da ya taɓa tufafin ɗayanmu, sai ya ce: "Ta goge shi (ta kankare shi), sannan ta murje shi da ruwa da yatsun hannu, sannan ta wanke shi da ruwa, sannan ta yi sallah da shi."

Kankarewa da murzawa a hadisin ba wajibi bane a kansu, hanya ce ta cire najasar, kuma abin da ake nema shi ne jinin ya tafi ta kowace hanya. Saboda haka idan mace ta wanke shi da ruwa kai tsaye har najasar ta tafi, ta wadatu, kuma wannan ne fahimtar mafi yawan malamai, wato Hana fiyya, Malikiyya, Shafi'iyya da Hanabila. Ibn Hajar a Fathul Bari ya bayyana cewa umarnin domin sauƙaƙa cire najasar ne, kuma Ibn Uthaymin ya ce haka. Tunda tufafin sun tsarkaka bayan wankewa, sallar da ta yi da su ta inganta, ba sai ta sake ba.

Idan alama ko launin jinin ya rage bayan ta yi ƙoƙarin wankewa, ba matsala. Hujjar hakan ita ce hadisin Khawla bint Yasar (RA), wanda Abu Dawud (365) da Ahmad suka ruwaito, inda Annabi (Sallallahu Alaihi Wasallam) ya ce mata ruwa ya isar mata kuma alamar ba ta cutar da ita. Wasu malamai sun raunana isnadinsa, amma Albani ya kyautata shi, kuma malamai sun fahimci cewa an yafe alamar da taƙi tafiya bayan an yi ƙoƙarin wankewa.

Amma idan ta yi sallah da jinin a jikin tufafi ba tare da wankewa ba, sai a duba: idan ta sani kuma ta yi da gangan, mafi yawan malamai sun ce ta sake sallar, domin tsarkin tufafi sharaɗi ne na sallah. Idan kuwa ba ta sani ba ko ta manta, akwai saɓani. Malikiyya sun tafi akan cewa ta sake cikin lokaci, amma Ibn Taymiyya, Shawkani da wasu sun ce sallarta ta yi, hujjarsu ita ce hadisin Abu Sa'id (Abu Dawud 650) cewa Annabi (Sallallahu Alaihi Wasallam) ya cire takalminsa a tsakiyar sallah lokacin da Jibril ya sanar da shi akwai najasa a jikinsu, amma bai sake sallar ba.

WALLAHU TA'ALA A'ALAM

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.