Yadda Ake Tsaftace Tufafi A Shari’a

𝐓𝐀𝐌𝐁𝐀𝐘𝐀❓

Assalamu alaikum, malam Allah ya ƙara daukaka, ya gafartama mahaifa, malam tambayata a nan shi ne, yaya sharia ta yi tanadi wurin tsaftace tufafi, don na ji ana cewa se anfara dauraye tufafi, kafin asa musu sabulu, wasu ma se su ce, za a wanke sau ukku kafin a saka sabulu

𝐀𝐌𝐒𝐀❗️

Wa alaikumus salamu warahamatullah,

Shari'a ba ta ɗora wa mutum wani tsari na dole wajen wanke tufafi ba, kamar ɗaurayewa kafin sabulu ko wankewa sau uku kafin a sa sabulu. Ba a samu hadisi ingantacce ko wata magana daga magaba ta da ta tabba tar da wannan tsari ba. Abin da shari'a ta tsara shi ne tsaftace najasa idan tufafi sun ƙazantu da ita, kuma a nan ne ake magana kan yawan wankewa.

Idan tufafin ba su ɗauki najasa ba, kawai datti ne na gumi ko ƙura, to ana wankewa ta duk hanyar da ta dace, da sabulu ko ba tare da shi ba, da ɗaurayewa kafin sabulu ko bayansa, komai ya halatta. Tufafin dake da datti kawai ba najasa bane, don haka tsarkinsu ya tabba ta, kuma sallah da su ta inganta, sai dai an fi so mutum ya yi sallah cikin tsafta. Allah ya ce

وَثِيَابَكَ فَطَهِّرۡ

"Kuma tufafinka, ka tsarkake su" (Muddaththir: 4).

Malamai sun fassara wannan da tsarkake su daga najasa da kuma tsaftace su. Idan najasa ce ta taɓa tufafin, to sai a cire ainihin najasar dake jikinsu, ko ta wace hanya, da ruwa ko sabulu ko wani abu mai cirewa. Bukhari da Muslim sun ruwaito a hadisin Asma'u da na yi bayani akai a amsan da ya gaba ta, inda Annabi (Sallallahu Alaihi Wasallam) ya ce a goge jinin, a murje shi da ruwa, a wanke shi. Ba a ambaci sabulu ba, kuma ba a ambaci adadin wanke wa ba. Kuma Hana fiyya, Malikiyya da Shafi'iyya sun ce idan najasar ta tafi ta hanyar wankewa sau ɗaya, ta wadatu, sai dai wasu sun fi son a yi sau uku don kwanciyar rai. Hanabila kuma a wata riwaya suna ganin sau bakwai, amma hujjar wannan tafi ƙarfi ne kawai a kan najasar kare (Muslim 279), wato lokacin da kare ya lasa kwano. Sauran najasa kuwa, ana duba ne ko ta tafi ko a'a, ba adadi ba.

Don haka, wanda yaji ana cewa dole sai an ɗauraye kafin sabulu ko sau uku, wannan bashi da tushe a shari'a, ra'ayi ne ko al'ada ce ta wasu mutane. Idan mutum yana son yin haka don ya tsaftace tufafinsa, ba laifi, amma kada ya mayar da shi abin wajibi ko sharaɗin sallah. Allah ya sa mu dace.

WALLAHU TA'ALA A'ALAM

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.