Sara Suka

Fatima Bello Bala (2023). Sara Suka. Ɗaukar Jinka (Labaran Da Suka Samu Nasara A Gasar Gajerun Labarai Ta Arc. Ahmed Musa Dangiwa, 2022). Kangiwa Multimedia and Communcation Company LTD

SARA SUKA

Na

Fatima Bello Bala

Gumi ke sartu a fuskata da goshina kamar ana gasa masara a tsakiyar garwashi a cikin rana, akai akai nake sharce gumi ina daɗa riƙon tayar keken da nake yiwa faci. Rediyon da ke kusa da ni ta sauya salon sautinta daga waƙe zuwa taken labarai, bayan gushewar taken muryar zabiyar dake gabatar da shirin labarai ta fara aikinta cike da ƙwarewa da zilaƙar harshe.

"Rundunar jami'an tsaro ta jihar nan, ta cika hannunta da wani matashin saurayi mai suna Auwalu Damfo. Matashin dai an kama shi ne da laifin aika Mahaifinsa lahira ta hanyar daddaɓa masa wuƙa a ciki.

Jami'i mai magana da yawun 'yan sanda Bamai Dabuwa, shi ya bayyana wannan al'amari a zantawarsu da manema labarai a wurin da al'amarin ya faru. Jami'in ya shaida wa manema labarai cewa Matashi Auwalu Damfo ya aikata wannan ta'asa ta wulla mahaifinsa ƙiyama ne bayan ya yi mankas da kayan maye..." Maganar ma'aikaciyar gidan radiyon ta ratsa dodon kunnuwana, wanda nake jin saukar maganar kamar an doka min guduma a ƙahon zuciyata ne.

"Ka ji ko?" Cewar wani Dattijo wanda ya kawo facin kekensa wajena, ina iya hango fuskarsa ƙunshe da takaicin abin da aka faɗa a rediyon, bai huta ba ya ci gaba da cewa.

"Ni dai na san hannu banza ba ya ɗaukar wuta, sai dai da magani ko sharifta. A irin ƙima da matsayi ko soyayyar ɗa ga iyaye, babu yadda za a yi mutum ya kashe mahaifinsa a cikin hayyacinsa, ashe dai wannan abin nasu na jaraba ya je ya sha ya fita a hayyacinsa ƙwaƙwalwarsa ta faɗa masa ƙarya ya ƙare a kan ubansa." Ya yi shiru yana kallon wani saurayi wanda shi ma facin ya kawo min, ina ganin saurayin ya buɗi baki ya fara magana.

"Gaskiya wannan ɗa dai ba ɗan halak ba ne..." Tuni gabana ya sake dokawa da ƙarfin gaske, ina jin bugun zuciyata na ninkuwa fiye da kima, wanda da za su lura da yanayina da sun fahimci na rasa nutsuwata tun farkon fara jin rahoton kisan kan da matashin ya yiwa mahaifinsa, na yi firgigit na kalli saurayin da ke wannan furucin, na goge gumin bazatan da ya fara karyo min fiye da na bayan da nake yi, a can cikin raina ina tuna ranar da nima aka jefe ni da irin waɗannan kalamai, ƙwaƙwalwata tana so ta yi min tariyar wani shuɗaɗɗen al'amari a cikin rayuwata ta baya, amma kwata-kwata ruɗanin rahoton kisan ya hana ni kataɓus.

"In banda ɗan haram, ya rasa wanda zai kashe ma sai mahaifinsa? Shi ya sa fa ba abin mamaki ba ne yanzu don an ce maka an aikata komai na laifi a ƙasar nan, don indai har mutum zai iya kashe wanda ya kawo shi duniya to babu abin da ba zai iya aikatawa ba..." Matashin ya sake faɗa da sautinsa mai amo, da nake jin kamar yana kwara min ruwan dalma a ƙahon zuci.

"Yo da ma mana!" Dattijon ya katse shi da hanzari.

"Ai illar shan kayan mayen nan da kake gani ta wuce duk yadda muke zato, shi ya sa Ubangiji ya la'anci mutum takwas da suka shafi sha'anin giya. Tun daga kan masu yin ta, da masu dakon ta har zuwa kan masu shan ta da dai sauransu. To kuma ba ita kaɗai ba, duk wani kayan maye ma Malamai suna ganin hukuncin ɗaya ne, bisa dogaro da wani hadisi na Ma'aiki Sallallahu alaihi wa sallam da yake cewa 'Dukkan abin maye giya ce... Giya kuma haramun ce.' " Ya ɗan tsagaita bayan gyaran murya ya ci gaba.

"Saboda shi shan kayan maye mutum ya fita a hayyacinsa shi yake jawo harkar daba, da sara suka tunda masu shan ba sa kunya ko shakkar kowa suke yin abin da suka ga dama..."

Tuni ƙwaƙwalwar da ke adana saƙo a kwanyata ta yi caraf, cike da zafin nama ta cafko min wata kalma a cikin kalaman Dattijon... 'Sara suka' ina maimaita kalmar ina tuna yadda 'yan sara sukan suka kewaye ni a wata shuɗaɗɗiyar rayuwata. Kamar a lokacin komai yake faruwa, kawai sai gani na yi majiyin ƙarfi cikin 'yan daban ya ɗaga zafgegiyar addarsa ya zafga mini sara a hannu, irin yadda ake girbe karan dawa ko na maiwa haka na ga matashin ya tsinke mini hannuna guda ɗaya.

 .....Na sake yin firgigit na dawo daga duniyar tunani da kiɗimar da na shiga, zuwa duniyar zahiri, hannuna mai kyan yana dafe da dungulmin hannun da aka sare mini a waccan lokacin, wanda nake ji kamar a lokacin aka datse shi. Ba na fatan ko a mafarki na sake ganin irin wannan baƙar rayuwa, ba ni ba ma, ina Addu'ar duk wani mai ƙaunata kada Allah ya jarrabe shi da shaye-shaye, don kuwa ba ƙaramin nakasu ba ne, ga rayuwar duk wani matashi mai yin shi.

"Subhanallahi! Malam Abba kukan me kake yi kuma?" Ban san cewa na bar kukan zuci na koma na zahiri ba, sai da na tsinkayi muryar Dattijon nan yana tambayana, a sannan ne na ji ɗumin ruwan hawayen da suke wasan tsere a kumatuna. Sai da na saka hannun rigata na share hawayen, sannan na nisa na fara magana da cewa.

"Ko ka san cewa Auwal Damfo shi ne ya sare mini hannu ɗayan nan nawa?" Da Dattijon, da matashin gaba ɗaya sai suka bi ni da kallo, irin na kaɗuwa da mamaki, ba su samu damar magana ba na ci gaba.

"Hatta mahaifinsa da kuka ji an ce ya kashe yanzu ba kowa ba ne face mahaifinmu." Sai a lokacin Dattijon ya fahimci dalilin da ya sa tunda aka fara wannan rahoton kisan hankalina ya tashi, kamar wanda yake zaune a kan zuga-zigin wuta.

"Amma dai wannan Auwal! Wannan Auwal! An yi asarar haihuwarsa." Furucin da Dattijon ya iya yi kenan yana yi kamar zai yi kuka. Jin hakan ne yasa na yi saurin katse dattijon na ce.

"Duk abin da ka ga Allah ya yi akwai hikima a ciki Baba, kuma yawancin rayuwar nan muna yin ta ne a kan doron karin maganar Bahaushe da yake cewa, ‘’abin da ka shuka shi za ka girba’’. Don haka ina tabbatar maka hatta shaye-shayen yawancinmu ke yi, iyayenmu ne suke shuka irinmu a haka, idan mun tsiro kuma wajen girbar mu yadda suka shuka mu sai mu zame musu damuwa." Cike da alamun rashin fahimta Dattijon da matashin suke kallona, haka ne ya sake sani jan numfashi da furzar da iska mai ɗumi a bakina na ce.

"Da yawan Hausawa sun jahilci wani hadisi na Ma'aik (S.A.W) da yake bayyana cewa a yi aure a hayayyafa don ya yi alfahari da yawanmu ranar alƙiyama. Shi ya sa za ka samu mutum ɗaya da mata uku ko huɗu, alhalin kwata-kwata ba ya samun abin da zai iya ɗaukar ɗawainiyarsu.

Mahaifinmu sana'ar gadi yake yi, kwata-kwata albashinsa bai wuce dubu goma sha biyar ba a wata. Amma kuma haka muka taso muka gan shi da mata uku, mu 'ya'yansa mun doshi arba'in a halin yanzu, sannan hatta gidan da muke ciki gidan haya ne mai ɗaki uku kacal.

Haka iyayenmu ke cunkusuwa a ɗaki ɗaya da ƙannenmu mata da ƙananun maza, sai dai wacce yake a kwananta ranar ta raba wa sauran matan 'ya'yanta kafin ita ma nata lokacin ya zagayo.

Mu kuwa 'ya'yansa maza tun muna shekara goma muke daina kwanan gidan, sai dai ya kaɗa mu waje mu je mu yi ta gararamba a masallatai da shagunan abokai. Ba kuma ya taɓa damuwa da a ina muka kwana, ko kuma ya binciki halin waɗanda muke kwana a wurinsu. Bahaushe ya ce, ' Kowa ya sayi rariya, ya san za ta zubar da ruwa', to kamar haka ne kowa ya san idan aka yi wa yaro irin wannan tarbiyyar tamu babu wani abin mamaki don an gan shi tsamo-tsamo a cikin tekun shaye-shaye yana nunƙaya.

A gidanmu hatta abincin da kowanne yaro da mahaifiyarsa za su ci sai dai su nema da kansu, tun da ba sai an faɗa ba, a bayyane yake albashin Mahaifinmu na dubu sha biyar, ko kuɗin hayar gidanmu a tsittsinke yake iya biyan masu gidan balle ya ci da mu. Shi ya sa duk wani aikin ƙarfi ko wankau na unguwar uwayenmu ke yi su samu na rufa wa kai asiri.

Mu ma 'ya'yansa tun muna shekara sha biyar muke ƙwarewa wajen neman kuɗi maimakon karatu, saboda ba a rayuwa sai da abinci, kuma ba abincin a gidan sai wanda muka nemo. Neman kuɗin kuwa ta hanyar halal ko haram, duk wanda ya zo karɓa kawai muke yi mu aika wa uwar hanji.

Auwal Damfo shi ne babban ɗan Mahaifinmu, a wajen neman abin da zai ci shi da mahaifiyarsa cikin tasha ya haɗu da abokanan da suka ɗora shi a layin zuƙe-zuƙe. Wanne tudu wanne gangare kawai sai gani muka yi ya koma ɗan sara-suka. Su ke tare mutane su ƙwaci wayarsu a unguwa, su ne farke shagunan mutane da daddare su ɗebi kuɗi da kaya, abubuwan ta'addanci dai iri-iri.

Tsautsayin tauna, in ji maye da ya cinye jariri. Wata rana Auwal ya jefar da kuɗinsa dubu biyu na tsinta, abinka da mai tsananin buƙata babu wata cigiya na je na fara kashe su. Ina tsaka da cin abincin da na saya Auwal ya zo kaina shi da abokanansa, ashe wai yaron da na tsinci kuɗin a gabansa ne ya sanar da su suna hannuna. Shi ne fa suka yi mini dira irin ta mikiya.

Bayan na gama sanar da su cewa na fara kashe kuɗin ne suke ta masifa, ashe wai wani ɗan siyasa ne ya bayar su raba suka faɗi. To a nan ne fa kayan mayen da suka sha ya fara yi musu tafsiri. Wata Shehiya a cikin ƙwayoyin da suka kora ustazancinta ya motsa, ta ba su fatawar cewa 'ai da ma an ce duk ɓarawon da aka kama ya yi sata a sare masa hannun satar, don haka ne ni ma wai a cikin mayen suka yanke hukuncin yi mini haddi su datse mini hannu tunda na yi musu satar kuɗinsu.

Kamar wasa haka nake ganin abin, ban taɓa zaton za su aikata ba sai da na ga hannuna ɗaya a ƙasa. Tun daga sannan kuma ban sake sanin a inda nake ba sai farkawa na yi na gan ni a asibiti an nannaɗe mini dungulmin hannun da bandeji. Su kuma wai tunda suka san sun yi ta'asar sai suka shuri takalmansu zuwa Legas cunkus ɗakin tsumma don gujewa hukunci.

"Kun san Depression ai?" Na tambaye su, ganin kamar suna buƙatar ƙarin bayani ne ya sa na ci gaba da magana.

"Ni ma da farko ban san ma'anarsa ba sai da na tsince ni tsumu-tsumu a cikinsa, wanda shi ne silar afkawa shaye-shayena.

Depression wani irin hali ne da mutum yake tsintar kansa na tsananin ƙunci da damuwa, irin damuwar da zai ji gaba ɗaya duniyar ta yi masa zafi kamar ya kashe kansa. Yana daga cikin murtuƙa-murtuƙan igiyoyin da suke yi wa da yawan matasa zarge mugun ƙulli su turke su a tirken shaye-shayen kayan maye babu ji babu gani ba tare da sun farga ba.

Yawanci wani abu na ƙunci ko damuwa ne yake kawo Depression, don haka ni dai yanayin baƙin ciki da ɓacin ran da nake shiga idan na ƙyalla ido na gan ni na koma mai hannu ɗaya ne masomar komai, ƙari a kan hakan kuma kawai sai Mahaifinmu ya saki Mahaifiyata a daidai lokacin da take jigilar yin jinyata ita da 'yan'uwanta, kuma kawai ya sake ta ne babu wani laifi na zaune ko na tsaye, sai don ya gano wata yana so ya aura.

Da farko ko barci ba na iya yi saboda baƙin ciki, da damuwa da kuma koke-koke da nake yawan yi, don haka likita ne ya fara rubuta mini magunguna da allurar da zan dinga amfani da su na yi barci, kafin daga baya kuma da ƙwayar ta zame mini tamkar sanyin idanuna, ta zame mini tamkar ƙarfen-ƙafa ta yadda indai ina son zaman lafiya da kwanciyar hankali to dolena sai na kora ta, ko kuma a yi mini allurar.

Akwai ƙalubale biyu da na fara fuskanta da waɗannan magungunan da nake amfani da su, na farko shi ne tsadarsu wajen saye, na biyu kuma dole sai da rubutun likita ake sayar da irin su. Sannan kuma shi asalin likitan da ya fara rubuta mini ita ya ce wai na kai matakin da bai kamata na ci gaba da shan ta ba don gudun irin matsalar da yawan sha ba bisa ƙa'ida ba zai haifar mini. Ga shi ni kuma idan ban sha ba ɗin babu lafiya, don haka ne na fara neman mafita ta kowanne hali.

Dungulmin hannun da baƙin cikin ganin shi a haka ya sa na faɗa shaye-shaye, da shi na yi amfani nake fakewa ina zaga gari inda ba a san ni ba, na nuna cewa ni musaki ne a ba ni sadaka, da haka nake tara kuɗin sayan ƙwaya da allurar.

Wajen sayowar kuwa kwanaki na ɗiba ina nazarin tsohon rubutun da likitan ya yi mini ina koya wa kaina yadda zan rubuta ba tare da an gane ba, da yake ina da basira daidai gwargwado kuwa a haka nake zuwa na sayo babu wanda zai gane cewa ba likita ba ne ya rubuta mini. Sai dai kawai na dinga canza kwanan watan ranar da na je sayayyar.

Don haka kafin na farga na zama gawurtaccen ɗan ƙwaya. Saɓanin kowanne magidanci da yake fafutuka don nema wa kansa da iyalansa abin da zai ci, sai ya zamana ni fafutukata kawai ta yadda za a yi na sayo rocket (wato ƙwayar) da za ta harba ni zuwa gajimare ko duniyar wata ne, ko da kuwa hakan na nufin sai na yi sata. Sai ya zamana gaba ɗaya nemana ina yin shi ne don na naɗa wa kaina rawanin tangaɗi ko barci kamar mushe.

Sai dai an ce mara gaskiya ko a ruwa gumi yake yi, shi ya sa yau da gobe har mai kemis ɗin ya ramfo ni. Don haka ne a wata rana da na je ya yi mini magana.

"Amma ranka ya daɗe, na ga kamar kana yawan zuwa nan kana sayan maganin nan."

Da murmushi na ce masa "Eh."

"Waye zai yi amfani da su?" Ya tambaye ni da wani irin kallo kamar na tuhuma. Cikin ƙoƙarin yi masa basaja na amsa masa.

"Ɗana ne, sikila ne." Na zaci da ya ji na faɗi haka kawai zai ɗauko mini na tafi, amma kamar wani ɗan jarida sai ya ci gaba da kwararo mini tambaya.

"Amma har na tsawon wanne lokaci yake amfani da su? Domin na ga ka daɗe kana zuwa nema, kuma har zuwa yaushe zai daina amfani da su? Saboda gaskiya waɗannan magani da allurar suna da matsala na saurin sabo da dogaro. Idan har mutum yana amfani da su akai-akai toh zai zamto jikinsa ya zo ya saba da su, daga nan kuma sai jikin ya zo ya dogara kacokan akan amfani da su, ta yadda idan har bai yi amfani da su ba, toh gani yake kamar mutuwa kawai zai yi. Wannan ya sa ake kula wajen bayar da su."

Na ɗan shafi busasshen leɓena da harshe, sannan na ce. "To shi likitan ne dai yake rubuta mana ita. Kuma yaron nan kuka yake yi indai ba wannan allurar aka yi masa ba ko barci ba ya iya yi balle mu ma ya bari mu yi."

Mai kemis ya sake yin murmushi sannan ya ce, "Duk ba jayayya nake yi maka ba, amma abin da nake so ka sani shi ne, yi wa ɗan naka wannan allurar zai samar masa da sauƙin raɗaɗin da yake ciki a yanzu ne kaɗai, amma kuma zai iya jaza masa wata matsalar da za ta iya tarwatsa rayuwarsa gaba ɗaya. Saboda yanzu kuna yi masa ita, jikinsa kuma yana ƙara sabawa da ita har ya zamana ya dogara da ita, sannan kuma allurar tana da nata illolin kamar sauran magunguna, daga ƙarshe illolin wannan allura kaɗai sun isa su hallaka shi, ƙari akan cutar amosarin jini da yake fama da ita.

Daga cikin illolin shan waɗannan magungunan ba bisa ƙa'ida ba akwai hawan jini, faɗuwar farat-ɗaya, cushewar ciki, bushewar baki, barci fiye da ƙima, zaucewa, rikicewa da sauran su.

Ka ga kenan, dawwama ana yi masa wannan allura kamar nakasa shi kuke yi, wataƙila ba da sanin ku ba. Don haka ina ba da shawara ku yi magana da likitan domin samun mafita, ko dai a canza masa magani ko kuma a fara rage yawan ba shi magani da allurar."

Kalamansa sun firgita ni matuƙa da gaske, har ma na ji a raina ya kamata na daina. Sai dai tun ba a je ko ina ba na fahimci cewa tuban nawa irin tuban muzuru ne, yana riƙe da kaza a baki yana cewa ya tuba. Domin kuwa ko a daren ranar kasa barci na yi sai da na ji ni ɗif! Na yi madiri.

Tun daga sannan kuma sai na fara tunanin daina shan wannan magani da allurar, sai na fara tunanin na nemi wata mafitar daban, wato dai kamar na ƙi cin biri kenan na sha romo. Sila kenan da na fara shan tabar wiwi da sholisho. Wani lokacin ma har kwata da take da matuƙar ɗoyi nake zubawa a kwalba na yi ta shaƙa da hanci.

A haka na yi ta rayuwa cikin gararamba, har zuwa lokacin da rana a tsaka na ga na fara yin wani irin fitsari mai ɗauke da wani abu kamar kumfa, jikina musamman hannaye da ƙafafuwa duk suka ɗan fara kumbura kamar fulawar da aka saka wa yis. Da farko kamar da wasa abin ya fara, ganin yana neman ta'azzara ne na yanke shawarar zuwa kemis ɗin mutumina.

Na yi sa'a kuwa shi na tarar, don haka ne bayan mun gaisa na fara faɗa masa damuwata. Ya yi mini tambayoyi da dama, amma tambaya ta ƙarshe da ya yi mini ita ce 'ko ina yin shaye-shaye.' To a nan ne na yanke shawarar faɗa masa gaskiya, na ce.

"Don Allah ka yi haƙuri, kwanaki na yi maka ƙarya. Gaskiya wannan takardar maganin ina samun ta ne ta ɓarauniyar hanya. Kuma ni ne nake amfani da duka abubuwan da nake zuwa saya, ina yin amfani da su ba ta hanyar da ta dace ba."

"Kana nufin maganin da allurar duka kake amfani da su lokaci guda?" Yanayin yadda ya mini tambayar ya nuna mini akwai matsala, don haka ne ko iya amsa masa ban yi ba sai dai gyaɗa kai da na yi kamar ƙadangare.

Ya ce, "Bayan su babu abin da kake sha?" Jin haka na faɗa masa duka abin da nake sha.

 "Ai kuwa ina mai baƙin cikin sanar da kai cewa amfani da su da kake yi ba bisa ƙa'ida ba ya jawo wataƙil ƙodarka ta taɓu. Abin da na guje maka kenan kamar yadda na faɗa maka tun watannin baya." Ya ƙarasa zancen yana kallona.

Cike da tashin hankali na fara sambatu, "Na yi ta so na daina amfani da su tun lokacin da ka ba ni shawara wallahi amma na kasa. Kuma da ni ina ganin kamar illar ba ta kai haka ba..."

"Kaico! Gaskiya ka yi gajeren tunani. Shi ya sa na ce ka je ka nemi shawarar likitanka, saboda barin shaye-shaye ga wanda ya zame masa jiki ba abu ne mai sauƙi ba, dole akwai matakan da ake bi.

Akwai abin da ake kira da (withdrawal syndrome). Shi ne yanayin da mai shan wasu rukuni na magunguna yake shiga idan aka ce ya bar shan su lokaci guda. Kowa da irin tasa matsalar da take biyo baya, wasu suna shiga tashin hankali, wasu sambatu, wasu gumi, wasu zazzaɓi, kaɗawar ido zuwa ja, da sauransu." Ya ɗan yi shiru, ya shaƙi numfashi ya ɗora.

"Dangane da illar magunguna kuwa, shan su ba bisa ƙa'ida ba na tsawon lokaci yana haifar da illoli da dama amma muhimmai a cikin su akwai:"

 Ya fara ƙirge da yatsa na farko,

"•Matsalar numfashi: Ƙwayar da mutane ke sha ta hanyar haɗiya ko shaƙa da hanci. Ko kuma hayaƙi irin na taba sigari da tabar Ibilis, suna haifar da matsala a sassan jiki da ke da alhakin samar da numfashi. Hakan na jawo mutum ya kasa numfashi sai da abin numfasawa (oxygen tank)"

Ya sake taɓa yatsa na biyu,

"•Ciwon ƙoda: Magunguna masu ɗauke da sinadaran, (heroin, ketamine, da synthetic cannabinoids) suna toshe matatar ƙoda su haifar da lalacewarta ko gazawa wajen aiki."

Ya taɓa yatsa na uku,

"•Cushewar Mafitsara: Saboda aikin rukunin magani na (Opiod) a tantanin da ke rufe mafitsara wato (Urinary sphincter), alamar hakan shi ne jin tsananin zafi a lokacin fitsari.

•Cushewar Ciki: Wannan ma yana samuwa ne sakamakon aikin waɗannan magunguna a tantanin da ke kulle ƙofar tumbi, sai ya rage motsin tantanin (gastric sphincter tone) da ma na ciki gaba ɗaya.

•Ciwon Hanta: Yawan shan ƙwaya ko giya yana lalata hanta.

•Kashe ƙwayoyin haihuwa (infertility)

•Tsananin raguwar gudun jini (hypotension).

•Hawan jini: Wasu daga cikin waɗannan magunguna kamar barasa (Alcohol) na saka jini ya hau.

•Yawan yin ɓari ga mace mai ciki, da haihuwar yaron dake da illa a yanayin halittarsa."

Tun da ya fara bayanin nake kwarara gumi kamar wanda ake yi wa surace, sai a lokacin na fahimci irin girman hatsarin da na jefa kaina. A ƙarshe ma ban san lokacin da na fara kuka ba, gani nake yi kawai kamar mutuwa zan yi.

Ganin yadda na tashi hankalina ne ya shiga yi wa zuciyata tausa, "Ka kwantar da hankalinka, sannan ka gode wa Allah da ya sa ka farga da wuri. Kamar yadda na faɗa maka akwai alamun cutar ƙoda a tare da kai, don haka kana buƙatar daina shan duk wani kayan maye da kake sha cikin gaggawa. Hakan kuma ba za ta yiwu da sauƙi ba dole sai dai ka kai kanka gidan gyaran hali (rehabilitation center).Domin a can ne za su ba ka dukkan wata gudumawa, kama daga kan shawarwari, magunguna, da kuma dabarun da za su raba ka da wannan ɗabi'ar a sauƙaƙe."

Na tsaya na ja numfashi daga basu labarin da nake, na mayar da kallona ga Dattijon mutumin da yake kallona kamar majigin da ake haskawa, haka shima matashin saurayin ko ƙwaƙƙwaran motsi ya gagara yi, kai na girgiza kana na ci gaba.

"Na yaba da tsarin gidan gyaran hali sosai, tabbas sunan nasa ya dace da shi, musamman bisa tasirinsa na sauya mummunar ɗabi'a zuwa kyakkyawa.

Irin yadda ake wankin babban bargo, haka suke wanke zukatan masu shaye-shaye ta hanyar ba su magungunan da suke maye gurbin waccan mai illar, wanda illar su bata kai ga waccan ba. Misali, amfani da cingam mai ɗauke da sinadarin (nicotine) a madadin shan taba sigari tare da rage adadin da ake amfani dasu a hankali har mutum ya saba.

Haka nan suna ba da magungunan da suke toshe aikin waɗancan magungunan da aka riga da aka dogara akan su. Misali, amfani da sinadarin (naltrexone) domin toshe aikin da (opioids) suke yi da kuma amfani da sinadarin (Flumazenil) domin toshe aikin (benzodiazepines) kamar su (diazepam) kenan.

Bayan wannan kuma akwai sashe na koyon sana'a, wanda a can ni ma na koyo wannan facin da nake yi. Ga shi yanzu ni da shaye-shaye sai tarihi, domin dai ko sigari ba na sha, kuma ina zaune ƙalau cikin farin ciki.

Na so matuƙa a ce an kai yayanmu Auwal Damfo wannan gidan shi ma ko zai daina. Sai dai shi kwata-kwata ba na ganin alamun saduda a tare da shi. Ina zargin hatta kashe mahaifinmun nan da ya yi yana da nasaba da sakin mahaifiyarsa da Abban namu ya yi ya auro wata bazawara, wataƙila hakan ne bai yi masa daɗi ba, ya sha faɗa masa sai ya kashe shi.

Shi ya sa a kullum na yi salla sai na nemi tsari da shaye-shaye da sharrorinsa. Sa'annan har na koma ga mahaliccina ba zan manta da 'Yan Sara suka ba, don su ne silar komai" Na ƙarasa zancena ina kallon dungulumin hannuna, daidai lokacin da na gama haɗa kayana na rufe shagon domin tafiya jana'izar mahaifinmu. Ina kuma iya jiyo sautin muryar dattijon na ratsa kunnuwana da cewa

 "Ka fahimci kamar mutuwar mahaifin nasu ba ta wani girgiza shi ba ko? Wataƙila hakan yana da nasaba da irin tarbiyyar da mahaifin nasu ya yi musu, ya watsar da su bai ja su a jiki ba ballantana ya nuna musu so har suka afka shaye-shaye.

Lallai wannan kukan kurciya ne ga mai hankali. Tabbas Abba ba zai taɓa mantawa da 'yan sara suka ba, saboda sun yi masa tabo mai wahalar goguwa."

Alhamdulillah!