Tasirin Karin Harshen Zamfarci a Fassarar Kebabbun Kalmomin Kiwon Lafiya a Asibitin Kwararru Ta Yariman Bakura

Citation: Umar, M.A. & Bashir, A. (2024). Tasirin Karin Harshen Zamfarci a Fassarar Keɓaɓɓun Kalmomin Kiwon Lafiya a Asibitin Ƙwararru Ta Yariman Bakura. Tasambo Journal of Language, Literature, and Culture, 3(2), 167-175. www.doi.org/10.36349/tjllc.2024.v03i02.020.

Tasirin Karin Harshen Zamfarci a Fassarar Keɓaɓɓun Kalmomin Kiwon Lafiya a Asibitin Ƙwararru Ta Yariman Bakura

Muhammad Arabi UMAR

Department of Languages and Cultures, Federal University Gusau, Zamfara, Nigeria

07062052814

arabiumar@fugusau.edu.ng

Abdullahi Bashir

Department of Languages and Cultures, Federal University Gusau, Zamfara, Nigeria

abdullahi.bashir@fugusau.edu.ng

08036481158

Tsakure

Karin harshe yana taka muhimmiyar rawa wajen samar da ingantacciyar sadarwa kamar yadda fassara ke da matuƙar muhimmnci a ɓangaren kiwon lafiya, musamman a karkara da ƙauyuka.Wani binciken da aka gudanar ya nuna kashi 77% na ma’aikata da marasa lafiya da ke zuwa Asibitin Ƙwararru ta Yariman Bakura sun fi son amfani da harshen Hausa wajen sadarwa tsakanin marar lafiya da ma’aikatan kiwon lafiya a matakai mabambanta. Har wa yau, daga cikin kashi 77% ɗin kashi 44% sun fi amfani da karin harshen Zamfarci (Bashir & Umar sh. 38, 2024). Wannan dalilin ne ya sa aka yi ƙoƙarin fito da tasirin karin harshen Zamfarci wajen fassara keɓaɓɓun kalmomin kiwon lafiya a asibitin ƙwararru ta Yariman Bakura da ke Gusau. An yi amfani da Ra’in Fassara ta La’akari da Karin Harshe, wanda Giles & Johnson (1979) ya yi amfani da shi a aikinsa inda ya nuna yadda ake samun bambancin fassara ta la’akari da karin harshe da kuma waɗanda ake yi wa fassara. Binciken ya gano cewa ana samun bambanci ta fannin fassarar wasu keɓaɓɓun kalmomin kiwon lafiya da suka shafi likitancin mata da na ƙananan yara tsakanin daidaitacciyar Hausa da kuma karin harshen Zamfarci ta fuskar tsarin sauti da gundarin kalmomi. Bayan da aka zaƙulo wasu kalmomin kiwon lafiya, aka fassara su tare da bayyana yadda ake faɗin su a Zamfarci, an ba wa ƙwararrun likitoci Zamfarawa domin tantancewa da ba da shawara saboda samun ingantacciyar fassara cikin karin harshen Zamfarci. Sakamakon ya kawo jadawali bakwai na wasu keɓaɓbun kalmomin da suka shafi likitancin mata da ƙananan yara. Ana sa ran a ci gaba da zaƙulo wasu keɓaɓbun kalmomi na wasu sassan kiwon lafiya domin taskace su da samar da wani ƙaramin kundi ko ƙamus na keɓaɓbun kalmomin kiwon lafiya cikin daidaitacciyar Hausa da karin harshen Zamfarci domin ƙara inganta sadarwa musamman a asibitin ƙwararru ta Yariman Bakura da sauran asisibitocin da ke cikin ƙasar da ake amfani da karin harshen Zamfarci.

Fitilun Kalmomi: Kalmomin kiwon lafiya, Karin harshen Zamfarci, Cututtukan ƙananan Yara, Asibiti

Gabatarwa

Fassara tana taka muhimmiyar rawa wajen samun ingantacciyar sadarwa tsakanin marasa lafiya da ma’aikatan kiwon lafiya a matakai daban-daban. Domin ita fassara ta ƙunshi bayyana ma’ana mafi kusa ko mafi dacewa daga harshen asali zuwa harshen karɓa ta fuskar ma’ana da salo (Nida, 1974). A taƙaice, fassara ita ce mayar da wani abu da aka faɗa ko aka rubuta daga harshen karɓa zuwa harshen bayarwa ba tare da sauya ma’anarsa ba. Fannin kiwon lafiya, fannin ne mai matuƙar muhimmanci wanda yake buƙatar ƙwarewa a kowane fanni, wanda ya haɗa da fassara. Ƙasashen duniya da suka ci gaba a fasahar sadarwa akan sami ƙwararrun ma’aikatan fassarar kiwon lafiya na dindindin ko na wucin gadi a manyan asibitoci da cibiyoyin kiwon lafiya, domin samun ingantacciyar sadarwa tsakanin ma’aikatan kiwon lafiya da marasa lafiya. Saboda haka rashin fahimtar Ingilishi, bai zai zama wata barazana ga marar lafiya da ya je jinya ƙasar Turai ba domin akan tanadi ƙwararrun masu tafinta ko kuma aikin fassara. Bincike ya nuna kashi 77% na ma’aikata da marasa lafiya da ke zuwa Asibitin Ƙwararru ta Yariman Bakura sun fi amfani da harshen Hausa wajen sadarwa tsakanin marar lafiya da ma’aikatan kiwon lafiya a matakai mabambanta. Har wa yau, daga cikin kashi 77% ɗin kashi 44% sun fi amfani da karin harshen Zamfarci (Bashir & Umar, sh. 38, 2024). Bugu da ƙari, binciken su Bashir da Umar 2024 ya gano cewa kashi 5% ne kawai na ma’aikatan kiwon lafiya a YBSH suke amfani da kebaɓɓun kalmomin kiwon lafiya wurin sadarwa tsakaninsu da marasa lafiya. Wannan ne ya nuna akwai buƙatar a gudanar da wani keɓaɓɓen nazari a kan kalmomin kiwon lafiya a asibitin ƙwararru ta Yariman Bakura tare da fito da tasirin karin harshen Zamfarci. Sakamakon ya samar da fassarar wasu keɓaɓɓun kiwon lafiya da suka shafi sassa daban-daban da kuma yadda ake samun bambanci tsakanin daidaitacciyar Hausa da kuma karin harshen Zamfarci ta fuskar tsarin sauti da gundarin kalmomi. Wannan zai taimaka wa likitoci da nas-nas da ungozuma da sauran ma’aikatan kiwon lafiya domin samun ingantacciyar sadarwa tsakanin marar lafiya da likita ko ma’aikacin kiwon lafiya. An tsara wannan maƙalar zuwa sassa kamar haka: Bitar ayyukan da suka gabata, taƙaitaccen tarihin asibitin ƙwararru ta Yariman Bakura, dabarun bincike, sakamakon bincike, kammalawa.

Bitar Ayyukan Da Suka Gabata

Azare (2002) a kundinsa mai taken “Fassara da Bayanan Wasu Fannoni na Aikin Likita cikin Hausa” Aikin ya tattaunawa muhimmancin fassara fannonin kimiya da fasaha cikin harshen Hausa saboda a bunƙasa harshen ta yadda zai tafi da zamani da sauye-sauyen zamani. Binciken ya kawo ra’ayoyin masana dangane da aikin fassara da kuma matsalolinta da shawarwari ga mai aikin fassara. Babbar manufar wannan aikin ta fito ne, inda mawallafin ya fassara kalmomi da suka shafi halittar mata da kuma yanayin bugun zuciya. Aikin ya ƙara zuɓo wasu kalmomin da suka danganci aikin likitanci tare da fassara su da kuma bayanansu.

Manazarta da dama sun gudanar da bincike da ayyuka a ɓangaren nazarin karin harshen Hausa ta fuskoki daban-daban, kamar: Bargery (1934), Ahmed da Bello (1970), Dogo (1977), Malka (1978), Muhammad (1978), Abubakar (1983), Sani (2003), Sani & Adamu (2023). Bugu da ƙari akwai waɗanda suka yi ayyuka a Zamfarci, Sakkwatanci da Hausar Yamma kamar Abbas (2000 da 2019) da Adamu (2020) da Maru (2015) da Umar (2024) sun bayyana yadda ake samun bambanci ta fuskar tsarin sauti da tasarifi da ginin jumla da gundarin kalmomi. Ayyukan za su taimaka wajen tsamo keɓaɓɓun kalmomin kiwon lafiya na Zamfarci musamman ta fuskar tsarin sauti da gundarin kalmomi.

Wannan aikin yana da alaƙa da nawa aikin saboda a kan fassara kalmomi likitanci ne aka yi shi kuma an ɗora shi a kan daidaitacciyar Hausa, sai dai kuma ya bambanta wannan aikin domin an gudanar da binciken ne a kan fassarar wasu kalmomin kiwon lafiya ne a asibitin ƙwararru ta Yariman Bakaura tare da kawo yadda suke a karin harshen Zamfarci.

Taƙaitaccen Tarihin Asibitin Ƙwararru ta Yariman Bakura, Gusau (Yariman Bakura Specialist Hospital, Gusau)

An fara gudanar da ayyukan kiwon lafiya a asibitin ƙwararru ta Yariman Bakura da ke Gusau, jihar Zamfara ranar 18 ga watan Maris, 2013. An fara da manyan sassan kiwon lafiya na kamar: sashen tiyata da kula da majinyata da sashen cututtun ƙananan yara da ɓangaren gani ko sashen likitancin cututtukan mata na haihuwa da sashen ba da magani da sashen bincike da gwaje-gwaje da sashen kula da haƙora da sashen gwaji hoto da kuma sashen adana bayanan marasa lafiya.

An tanadi ƙwararrun likitoci a ɓangarori daban-daban da kuma nas-nas da unguzomomi da masu kula da majinyata da masu gudanar da asibitin a matakai daban-daban. Har wa yau, an tanadi kayayyaki na zamani a sashen tiyata da sashen kula da haɗurra da sashen ƙananan yara da sahen mata masu juna biyu da sashen likitancin cututtukan mata na haihuwa. Haka kuma, an tanadi wurin ba da magani da kuma sashen bincike da gwaje-gwaje. Akwai ma’aikata masu tsaftace ɗakunan jinya da tsaftace muhalli ciki da waje domin samar da ayyukan kiwon lafiya mai inganci. A watan Fabarairu na 2014 aka fara gudanar da sashen wankin ƙoda wanda shi ne na farko a tarihin jihar Zamfara.

Wannan asibitin yana samar da ayyukan kiwon lafiya ga ɗaukacin al’ummar jihar Zamfara da kewayenta kuma ya sauƙaƙa zuwa manyan asibitoci da ke jihohin da ke maƙwabtaka da Zamfara.

Kasancewar, mafi yawan marasa lafiya da ke mu’amala da wannan asibitin Hausawa ne ko kuma masu jin harshen Hausa. Hakan ya sa, masu gudanarwa suka fassara sassa daban-daban da ke cikin asibitin domin ya zama jagora ga marasa lafiya kamar haka:

Hoto 1: Hutunan Fassara Sassa Daban-daban na YBSH

Wannan ya nuna irin ƙoƙarin da hukumar gudanarwa ta yi wajen fassara wasu sassa daban-daban domin sauƙaƙa wa majiyanta da ba su jin harshen Ingilishi. Duk da yake akwai wasu sassa da ba a fassara ba kamar:

Waɗannan wasu sassa ne daga cikin sassan da ba a fassara ba.

Dabarun Gudanar da Bincike

Kasancewar wannan maƙala ce ta biyu daga jerin maƙalu uku da aka ƙuduri rubutawa a kan “Tasirin Aikin Fassara a Fannin Kiwon Lafiya: Keɓaɓɓen Nazari A Asibitin Ƙwarraru ta Yariman Bakura, Gusau’’. A maƙala ta farko, an gudanar da bincike ta hanyar raba tambayoyin bincike ga ma’aikatan kiwon lafiya da kuma marasa lafiya da masu ruwa da tsaki a harkar kiwon lafiya. An gano cewa kashi 77% na ma’aikatan kiwon lafiya da marasa lafiya sun fi amfani da harshen Hausa. Sannan kuma binciken ya gano giɓi wajen amfani da keɓaɓɓun kalmomin kiwon lafiya. An nemi shawarar masana da ƙwararrun likitoci a kan jerin kalmomin da aka fi yawan ta’ammuli da su a sassa daban-daban. An zaƙulo keɓaɓɓun kalmomin kiwon lafiya daga manyan ƙamusun keɓaɓɓun kalmomi da aka rubuta da Ingilishi da suka shafi sashen likitancin cututtukan mata da sahen kula da ƙananan yara. An yi ƙoƙarin fassara waɗannan kalmomi ta hanyar tuntuɓar ƙwararru da masana kiwon lafiya da kuma ƙwararru a fannin aikin fassara. Haka kuma an dubi ayyukan masana kamar Azare (2002). An yi amfani da kafafen sadarwa na intanet kamar Whatsapp da Facebook domin aika wa da tambayoyi don jin ra’ayin masana a kan wata fassara. Bugu da ƙari, an dubi fassarar da aka gudanar a wasu ayyuka da suka shafi kiwon lafiya. Kuma an dubi ƙamusu na Ingilishi zuwa Hausa domin samun haske da daidaita fassara. Har wa yau, an tuntuɓi likitoci da nas-nas da ke amfani da Zamfarci domin samun ingantacciyar fassara. Bayan an kammala tattara fassarar, an miƙa ta ga wasu ƙwararrun likitoci da masana harshen Hausa da al’adu domin tantance ingancin fassarar. An yi amfani da Ra’in Sadarwa a Fannin Kiwon Lafiya, wannan ra’in an ɗora shi a kan yadda ake ƙirƙira, watsawa, karɓa, da fahimtar saƙonnin da suka shafi kiwon lafiya. Yana mayar da hankali kan sadarwa tsakanin ma’aikatan kiwon lafiya da majinyata ko marasa lafiya . Wannan ra’i ya taimaka wajen samun nasarar fassara wasu keɓaɓɓun kalmomin kiwon lafiya daga ingilishi zuwa Hausa.

Sashen Kula da Ƙananan Yara (Paediatric)

Sashen kula da ƙananan yara wani reshe ne daga rassan likitanci wanda ke da alhakin kula da lafiyar ƙananan yara. Akwai ƙwararrun likitoci waɗanda suka samu horo a fannin kula da ƙananan yara da jarirai. Waɗannan likitocin su ke tantance cututtuka da suka shafi ƙananan yara ta hanyar gwaje-gwaje, sannan su ba da magani da shawarwari. Kasancewar yanayin jiki da halayyar yara sun bambanta da na manyan mutane, don haka ne aka ware wannan sashe na kula da cututtuka da matsalolin ƙananan yara. Likitocin ƙananan yara kan yi ƙoƙarin gano cututtukan da ke addabar yara, da kuma ba da magani da yin allurar riga-kafi da ba da shawarwarin kiwon lafiya. Misali, idan yaro yana fama da zazzaɓi, nan take likitan yara zai yi masa tambayoyi domin gano matsalar. Don haka, akwai buƙatar samun ingantacciyar sadarwa tsakanin ƙananan yara da likitocin ƙananan yara domin Bahaushe yana cewa mai renon jinjiri shina sumbanta tasa. Don haka, fassara kalmomin kiwon lafiya da suka shafi fannin likitanci ƙanan yara tamkar ido ne ga makauniya musamman ga asibitin ƙwararru ta Yariman Bakura da ke ta’ammuli da ƙananan yara daga karkara. Wannan zai sauƙaƙa tare da samun ingantacciyar sadarwa tsakanin likita da marasa lafiya.

Cututtuka Masu Saurin Yaɗuwa (Communicable Disease)

Abin da ake nufi da cututtuka masu saurin yaɗuwa, su ne cututtukan da ƙwayoyin cuta kan samar. An halicci biliyoyin ƙwayoyin cututtuka masu iya kawo cututtuka da ɗan’adam ke iya kamuwa da su. Ana iya kamuwa da su ta hanyar shaƙar iska ko ruwa ko abinci ko ta hanyar taɓa wanda ya kamu da mai ciwo ko hanyar cizon wata dabba ko ƙwaro kamar zazzaɓin cizon sauro. Wadannan cututtuka suna yaɗuwa idan wani ya ɗauka daga wani, misali idan wani ya yi tari ya watsa ƙwayoyin cututtukan a iska, waɗansu da dama na iya kamuwa da cutar ta hanayar shaƙar wannan iska. An zaɓo wasu keɓaɓɓun kalmomi da suka shafi wannan aka fassara su kamar yadda yake a jadawalin da ke ƙasa.

Jadawali na 1: Cututtukan Masu Saurin Yaɗuwa Da Suka Shafi Ƙananan Yara

Lamba	Ingilshi	Hausa	Zamfarci
1	Malaria	Zazzaɓin cizon sauro	Zazzaɓin cizon sauro/janti
2	Tuberculosis	Tarin fuka/tibi	Twarin huka
3	HIV/AIDS	Cutar SIDA	Cuta mai karya garkuwa
4	Measles	Ƙyanda/ Baƙon dauro	Gaida/ ciwon dussa/na kwangwalo
5	Diarrhea	Gudawa	Zawo/amai da zawo
6	Pneumonia	Namoninya/rangaza	Ciwon haƙarƙari/sanyin haƙarƙari
7	Meningitis	Sanƙarau	Ɗan sanƙarau
8	Typhoid fever	Zazzaɓi	Zazzaɓin tayifod/shawara
9	Fever	Zazzaɓi	Masassara
10	Yellow fever	Zazzabin ciwon sauro	Rawaya
11	Ebola Fever	Zazzaɓin Ibola	Masassarar Ibola
12	Lassa fever	Zazzaɓin lasa	Masassarar lasa
13	Echovirus	Ƙuraje	Ƙuraje

 A waɗannan misalai an samu tasirin Zamfarci ta fuskar furuci da gundarin kalmomi, misali a fassarar “Tuberculosis” a DH, ‘Tarin fuka’ a Zamfarci kuma’ ‘twarin huka’ (/t/®/t^w/) (/f/®/h/).  sai kuma A ɓangaren gundarin kalmomi, akwai tasiri Zamfarci, kamar inda a Zamfarci, ake da “Gaida, ciwon dussa, ciwon na kwangwalo’’.

Cututtuka Marasa Saurin Yaɗuwa

Cututtuka marasa saurin yaɗuwa, su ne cututtukan da sukan sami ɗan’adam haka kawai a sakamakon yanayin ci gaban zamani da halayya da zamantakewa da bambancin muhalli ko ƙwayoyin halittu da aka gada a wasu lokuta. Ga jerin wasu keɓaɓbun kalmomi da aka fassara da suka shafi fannin likitancin ƙananan yara.

Jadawali na 2: Cututtuka Masu SaurinYaɗuwa da Suka Shafi Ƙananan Yara

Lamba	Ingilishi	DD Hausa	Zamfarci
1	Diabetes	Ciwon Sukari	Ciwon Shuga
2	Heart Disease	Ciwon Zuciya	Ciwon Zucciya
3	Hypertention	Ciwon Hauhawar Jini	Ciwon Hawan Jinni/Borin Jini
4	Polio	Shan Inna	Shan Inna/Riga-Kahi
5	Asthma	Ciwon Asma	Ciwon Huka
6	Cancer	Ciwon Daji/Sankara	Ciwon Daji
7	Obesity	Ciwon Ƙiba	Ciwon Ƙiba
8	Chronic Kidney Disease	Ciwon Ƙoda Mai Tsanani	Ciwon Ƙoda Mai Tsanani
9	Mental Health Disorders	Rashin Lafiyar Taɓin Hankali	Ciwon Hauka
10	Sickle Cell Disease	Cutar Sikila	Cutar Sikila
11	Epilepsy	Farfaɗiya	Hwarhwaɗiya
12	Eczema	Ƙyasfi	Ƙyasfi
13	Stroke	Bugun Zuciya	Mutuwar Sashe
14	Wooping Cough	Tarin Shiƙa	Lala
15	Jaundice	Shawara	Shawara

A nan ma akwai tasirin karin Zamfarci inda ’’farfaɗiya” ta koma “hwarhwaɗiya”. (/f/®/^hw/)

Jadawali na 3: Kalmomin Da Suka Shafi Alamomin Cututtukan Ƙananan Yara

Lamba	Ingilishi	DD Hausa	Zamfarci
1	Fever	Zazzaɓi	Masassara
2	Cough	Tari	Twari
3	Sneezing	Atishawa	Attishawa
4	Sore Throat	Ciwon Maƙoshi/ Bushewar Maƙogwaro	Ciwon Maƙoshi
5	Runny Nose	Mura, Zubar Da Majina	Mura/ Zubar Da Majina
6	Vomiting	Amai	Maiso, Mazallaƙo, AmaiHaraswa
7	Diarrhea	Zawo	Zawo/Amai da Zawo
8	Rash	Ƙuraje	Ƙurarraji/Ƙurajen Zuhwa
9	Fatigue	Gajiya	Kasala
10	Lethargy	Mutuwar Jiki	Macewar Jiki
11	Drowsiness	Gyangyadi	Angaje/Juwa/Jiri
12	Irritability	Rashin Nutsuwa	Rashin Sukuni
13	Poor Appetite	Rashin Ɗanɗano	Rashin Ɗanɗwano
14	Earache	Ciwon Kunne	Ciwon Kunne
15	Weight Loss	Ramewa	Ramewa
16	Headache	Ciwon Kai	Ciwon Kai
17	Abdominal Pain	Ciwon Ciki	Ciwon Ciki
18	Nasal Congestion	Toshewar Hanci	Toshewar Hanci
19	Constipation	Ƙullewar Ciki	Bushewar Ciki
20	Difficulty Breathing	Wahalar Yin Numfashi	Wahalar Yin Sheɗa
21	Nightmares	Mafarkin Abin Tsoro	Mafarkin Dare
22	Night Sweats	Zufan Dare	Zuhwan Dare
23	Joint Pain	Ciwon Gaɓoɓi	Ciwon Gaɓɓai
24	Muscle Pain	Ciwon Gaɓoɓi	Ciwon Gaɓɓai
25	Blurred Vision	Gani Gara-Gara	Gani Garaye-Garaye
26	Frequent Urination	Yawan Fitsari	Hitsari A kai-A kai

 

Jadawali na 4: Wasu Kalmomin Da Suka Shafi Ƙarancin Abinci Da Sinadari

Lamba	Ingilishi	Hausa	Zamfarci
1	Malnutrition	Rashin Isasshen Abinci Mai Gina Jiki	Tamowa
2	Stunting	Tsumburewa	Tsimbirewa
3	Micronutrient Deficiency	Ƙarancin Sinadarin Gina Jiki	Ƙarancin Sinadarin Gina Jiki
4	Kwashiorkor	Kwashako	Tarƙoshi/Ƙaton Kai/Ta-Ƙauye
5	Marasmus	Kumburin Ciki	Kumburin Ciki
6	Dehydration	Ƙarancin Ruwan Jiki	Ƙarancin Ruwan Jiki
7	Developmental Delay	Tawayar Girma	Tawayar Girma
8	Failure To Thrive	Rashin Saurin Girma	Rashin Saurin Girma
9	Growth Monitoring	Bibiyar Girman Yaro	Bibiyar Girman Yaro
10	Infant Mortality Rate	Yawaitar Mutuwar Jarirai	Yawaitar Mace-Macen Jarirai
11	Immunization	Rigakafi	Riga-kahi
12	Low Birth Weight	Haihuwar Jarirai Marasa Nauyi	Haihuwar Jarirai Marasa Nauyi
13	Neonatal Period	Kwana 28 Bayan Haihuwar Jariri	Kwana 28 Bayan Haihuwar Jinjiri
14	Neonatal Jaundice	Shawarar Jarirai	Shawarar Jarirai
15	Oral Dehydration Theraphy	Ruwan Gishiri Da Sukari	Ruwan Gishiri Da Shuga
16	Stunted Growth	Cuta Mai Tauye Tsawo	Cuta Mai Tauye Tsawo
17	Zinc Deficiency	Ƙarancin Sinadarin Zink	Ƙarancin Sinadarin Zink
18	Vitamin A Deficiency	Ƙaranci Sinadarin Bitamin A	Ƙaranci Sinadari Bitamin A
19	Breastfeeding	Shayarawa	Shayarwa
20	Food Insecurity	Ƙarancin Abinci	Ƙarancin Abinci
21	Food Safety	Wadatar Abinci	Wadatar Abinci

 

Sashen Likitancin Mata/Gani (Gynaecology)

Likitancin Mata, wani ɓangare ne na sassan kiwon lafiya da ake samu a manyan asibitoci, da asibitin ƙwararru. Likita ne da yake da ƙwarewa a ɓangaren lafiyar mata wanda ya haɗa da bangarorin haihuwa da ba da kariya a ɓangaren matantaka ko kuma ba da magani da yin tiyata da ta shafi ɓangaren mahaifa. Ita wannan kalma, wato Gynaecology ta keɓanta ne da irin ciwuka da matsaloli da kuma magani na mata. Ma’ana, duk wani ciwo ko wata matsala ko magani wanda yake ya keɓanta ne kurum ga mata, to ya faɗo cikin wannan ɓangaren, musamman abubuwa da suka shafi matanci, da haihuwa da sauransu. Saboda haka, ganin irin abubuwa da ke ƙunshe cikin wannan kalma mun yi ƙoƙarin fassara ta da ‘’Ilimin Ciwuka da Lafiyar Mata” Azare (sh. 50, 2022)

Jadawali na 5: Keɓaɓɓun Kalmomin Likitancin Cututtukan Mata

Lamba	Ingilishi	Hausa	Zamfarci
1.	Amenorrhea	Jinkirin Haila	Ɗaukewar Al’ada
2.	Dysmenorrhea	Ciwon mara na Al’ada	Ciwon mara na Al’ada
3.	Ovulation	Ƙyanƙyasar Ƙwai	Ƙyanƙyasar Ƙwan Halitta
4.	Dysmenorrhea	Zazzafar Haila	Ciwon Mara Na Al’ada
5.	Endometriosis	Cutar Ƙuryar Mahaifa	Cutar Ƙuryar Mahaihwa
6.	Pelvic Inflammatory Disease (PID):	Ciwon Kogon Mahaifa	Ciwon Kogon Mahaihwa/Sanyin Mata
7.	Cervical Dysplasia	Alamun Kansar Mahaifa	Alamun Kansar Mahaihwa
8.	Ovarian Cysts	Kumburin Ƙwanson Ƙwai	Kumburin Ƙwanson Ƙwan Halitta
9.	Cervical Cancer	Kansar Bakin Mahaifa	Dajin/Kansar Bakin Mahaihwa
10.	Ovarian Cancer	Kansar Ƙwanson Ƙwai	Dajin Ƙwanson Ƙwan Halitta
11.	Vaginal Infections	Cututtukan Sanyin Mata	Cututtukan Sanyin Mata
12.	Urinary Incontinence	Ciwon Mafitsara	Ciwon yoyon hitsari
13.	Evacution	Wankin Mahaifa	Wankin Mara
14.	Amniosynthesis	Awon Lafiyar Tayi	Gwajin Lahiyar Tayi
15.	Cervical Semear	Gwajin Bakin Mahaifa	Gwajin Bakin Mahaihwa
16.	Contraceptive Pills	Ƙwayoyin Tazarar Iyali	Ƙwayoyin Tsarin Iyali
17.	Cordocentesis	Gwajin Mikin Ciki	Gwajin Gymbon Ciki/Gwajin Cibiya
18.	Dilatation & Curratage	Wankin Ciki	Wankin Ciki
19.	High Vaginal Swab	Binciken Lafiyar Matanci	Binciken Lahiyar Matantaka
20.	Gravidity	Adadin Ɗaukar Ciki	Yawan Ɗaukar Ciki
21.	Hysterectomy	Cire Mahaifa	Cire Mahaihwa
22.	Intra Uterine Devine	Tsarin Iyali Ta Cikin Mahaifa	Tsarin Iyali Ta Cikin Mahaihwa
23.	Injectables	Tsarin Iyali Ta Allura	Tsarin Iyali Ta Allura
24.	Airophic Vaginities	Ƙeƙeshewar Gaba	Ƙeƙeshewar Gaba/Bushewar Farji
25.	Erosion Of The Cervix	Ƙazuwar Bakin Mahaifa	Ƙazuwar Bakin Mahaihwa

 

Jadawali na 6: Keɓaɓɓun Kalmomin Likitancin Cututtukan Mata

Lamba	Ingilishi	Hausa	Zamfarci
1.	Abdominal Pregnancy	Sabauɗin Ciki	Ciki Bayan Mahaihwa
2.	Anistomastia	Ƙarancin Mama	Ƙarancin Nono
3.	Antepatum Haemorrhage	Ɓallewar Mabiyiya	Ɓallewar Uwa
4.	Bi-Cornate Uterus	Kaucin Mahaifa	Kaucin Mahaihwa
5.	Blastomer	Bunƙasar Tayi	Bunƙasar Tayi
6.	Cryptomenorrhea	Kumamiyar Al’ada	Kumamiyar Al’ada
7.	Hemoperitoneum,	Tararren Jinin Ciki	Tararren Jinin Ciki
8.	Hyperemesis Gravidarum	Zazzafan Amai	Lalurar Amai
9.	Menorrahagia	Yalwar Al’ada	Yalwar Al’ada
10.	Metrorrhagia	Ballagazar Al’ada	Wasar Al’ada
11.	Oligomenorrhea	Bahaguwar Al’ada	Ƙarancin Al’ada
12.	Placenta Previa	Azarɓaɓin Mabiyiya	Uwa Bayan Mahaihwa
13.	Polyhydramnious	Tumbatsar Mahaifa	Tumbatsar Mahaihwa
14.	Post-Partum	Mai Jego	Mai Jego/Biƙi
15.	Tubal Blockage	Cushewar Hannayen Mahaifa	Cushewar Hannayen Mahaihwa
16.	Utero-Vaginal Prolage	Zazzagowar Mahaifa	Zazzagowar Mahaihwa
17.	Poetitis	Ƙwarin Dubura	Ƙwarin Dubura
18.	Salphingitis	Ciwon Hannan Mahaifa	Ciwon Hannun Mahaihwa
19.	Vesico-Vaginal-Fistula (V.V.F)	Ciwon Yoyon Fitsari	Ciwon Yoyon Hitsari
20.	Vaginal Atrophy	Ciwon Tsimburewar Farji	Ciwon Tsumburewar Gaba
21.	Vulvar Dermatitis	Ƙaiƙayin Mara	Ƙaiƙayin Mara
22.	Volvo Vaginitis	Ƙaiƙayin Gaba	Ƙaiƙayin Gaba

 

Jadawali na 7: Keɓaɓɓun Kalmomin Likitancin Cututtukan Mata    

Lamba	Ingilishi	Hausa	Zamfarci
1.	Ingilishi	DD Hausa	Zamfarci
2.	Abdominal Colic	Murɗewar Ciki	Murɗewar Ciki
3.	Asherman's Syndrome	Rufewar Mahaifa	Rufewar Mahaihwa
4.	Batholinitis	Kumburin Jijiyar Maiƙo	Kumburin Jijiyar Maiƙo
5.	Dysfunctional Uterine Bleeding	Yoyon Jini	Yoyon Jini
6.	Mastitis	Ciwon Mama	Kumburin nono
7.	Abdominal Pain	Ciwon Ciki	Ciwon Ciki
8.	Pelvic Pain	Ciwon Ƙugu	Ciwon Baya

 

Sakamakon Bincike da Shawarwari                                  

a.      Wannan bincike ya gano cewa ana samun tasirin karin harshe wajen fassara keɓaɓɓun kalmomin kiwon lafiya.

b.      An gano cewa karin harshen Zamfarci wanda yake ɗaya ne daga cikin rukunin Hausar Yamma yana taka muhimmiyar rawa wajen yadda likitoci da marasa lafiya ke fassara wasu keɓaɓbun kalmomi da suka shafi ɓangare kula da yara da kuma likitancin mata a asibitin ƙwararru ta Yariman Bakura.

c.       Karin harshen Zamfarci yana da tasiri ƙwarai a asibitin ƙwararru ta Yariman Bakura.

d.     Fassara kalmomin kiwon lafiya cikin Zamfarci zai taimaka wa likitoci da sauran ma’aikatan kiwon lafiya na asibitin ƙwararru ta Yariman Bakura

e.      Fassara keɓaɓɓun kalmomin kiwon lafiya a dukkan sassan kiwon lafiya na da tasiri wajen samun ingantacciyar sadarwa tsakanin marasa lafiya da ma’aikatan kiwon lafiya.

Kammalawa

Binciken ya nuna cewa kashi 60 sun fi son sadarwa a cikin Daidaitacciyar Hausa da kuma Zamfarci. Fassara keɓaɓɓun kalmomin kiwon lafiya cikin Zamfarci zai taimaka wajen bunƙasa karin harshen Zamfarci da kuma inganta fagen fassara da sadarwa. Har wa yau, zai taimaka wa likitoci da ɗalibai Hausawa da masu amfani da Zamfarci da ke aiki a asibitin ƙwararru ta Yariman Bakura da sauran cibiyoyin kula da kiwon lafiya. Ana fatan a ci gaba da tattara keɓaɓɓun kalmomin kiwon lafiya cikin Hausar Yamma da kuma Zamfarci domin samar da wani ƙaramin daftari ko ƙamusu. Ana ba da shawara cewa ya kamata a samu ƙwararru a fanni fassara da suka samu horo a kan fannin kiwon lafiya, su zama masu tafinta ko aikin fassara a asibitin ƙwararru ta Yariman Bakura.

Manazarta    

Abbas N.I. (2000) .The Study of Zamfarci Dialect Unpublished B.A. Dissertation, Department of Nigerian Languages, Usmanu Ɗanfodiyo University, Sokoto.

Abbas N.I. (2019). “Nazarin Wasu Nau’o’in Kare-Karen Hausar Yamma da Siffofinsu.” Unpublished Ph.D. Thesis, Department of Nigerian Languages, Usmanu Ɗanfodiyo University, Sokoto.

Abubakar, A. (1983). Generative Phonology and Dialect Variation: A Study of Hausa Dialects, Unpublished PhD Thesis, University of London.

Adamu, S. (2020). The Study of Phonological Variations Between Garewanci and Zamfaranci Sub-dialects of Zamfara” Unpublished M.A Dissertation, Department of Linguistics and Foreign Languages, Bayero University, Kano.

Ahmed, U. and Daura B. (1970). An Introduction to Classical Hausa and the Major Dialects. Zaria, Northern Nigeria Publishing Company.

Azare, Y. M. (2004). Fassara da Bayanan Wasu Fannoni na Aikin Likita Cikin Hausa Unpublished M.A. Dissertation, Department of Nigerian Languages. Bayero University, Kano.

Bashir, A., & Umar, M. A. (2024). Hausa in Hospitals: Exploring Healthcare Communications in Yariman Bakura Specialist Hospital Gusau, Zamfara State, Nigeria. Middle East Research Journal of Linguistics and Literature, 4(02), 35–42. https://doi.org/10.36348/merjll.2024.v04i02.003

Bello, A. (2016). Hausa Dialects and Distinctive Feature Analysis. Zaria: Ahmadu Bello University Press, Ltd.

Concise Medical Dictionary. (2023). Oxford University Press

Dogo, A. M. (1977). A Comparative Study of Sakkwatanci and Kananci. Unpublished M.A. Dissertation, Ibadan, University of Ibadan

Giles, H., & Johnson, P. (1979). Speech accommodation theory: A social psychological perspective. In H. Giles & R. N. St. Clair (Eds.), Language and social psychology (pp. 145-205). John Wiley & Sons.

Malka, J. (1978). “Nazarin Bambance-Bambance da ke Tsakanin Daidaitacciyar Hausa (Nijeriya) da Hausa Filinge (Jamhuriyar Nijar) ta Fuskar Tsarin Fannin Furuci”. Harshe 1 Journal of Department Nigerian and African languages Ahmadu Bello University Zaria, Nigeria. Shafi na 19-51

Maru, A.M. (2015), “Morpho-Lexical Variation in Zamfarci”. Unpublished M.A. Dissertation: Department of Linguistics Usmanu Ɗanfodiyo University, Sokoto.

Miller, B. F., & Keane, C. B. (1972). Encyclopedia and Dictionary of Medicine and Nursing. http://books.google.ie/books?id=PSlrAAAAMAAJ&dq=Medical+Dictionaries+and+Encyclopedias&hl=&cd=1&source=gbs_api

Nida, E. A., & Taber, C. R. (1974). The Theory and Practice of Translation. Brill Archive. http://books.google.ie/books?id=odoUAAAAIAAJ&printsec=frontcover&dq=Nida+1974+The+Theory+and+Practice+of+translation&hl=&cd=1&source=gbs_api

Sani, A-U. & Adamu, S. (2023). Daga Hausar Rukuni Zuwa Ɓoyayyiyar Al’ada: Keɓaɓɓen Nazari A Kan Hausar Telolin Garin Gusau. Tasambo Journal of Language, Literature, and Culture, 2(2), 115-123. www.doi.org/10.36349/tjllc.2023.v02i02.013.

Sani M.A.Z. (2003). Alfiyyar Mu’azu Sani 3 Karorin Harshen Hausa A Waƙe. Kano: Benchmark Publishers

Stedman, T. L. (2005). Stedman’s Medical Dictionary for the Health Professions and Nursing. Lippincott Williams & Wilkins. http://books.google.ie/books?id=XzvU0qd4IQkC&printsec=frontcover&dq=Medical+Dictionary&hl=&cd=3&source=gbs_api

Umar, M. A. (2024). Acoustic Features of Hausa Consonants: A Study of Sokoto Dialect. Unpublished M.A. Dissertation, Department of African Languages and Cultures, Ahmadu Bello University, Zaria.