7.12 Tserel
Wannan ma wasa ne wanda yara maza da mata duka suna yi. Akan iya yin tseren tsakanin kimanin yara biyu kacal. Sai dai idan aka samu taron yara, abin ya fi armashi. Wasan ba ya tafiya da waƙa, duk da ma wani lokaci yara na yin kirari da zuga ga masu tserel saboda su dage kada a bar su a baya.
7.12.1 Wuri Da Lokacin Wasa
i. Akan gudanar da wannan wasa a dandali da kuma makarantun boko.
ii. Akan gudanar da wasan da hantsi ko da yamma ko da dare.
7.12.2 Yadda Ake Wasa
Masu tserel za su jeru a layi ɗaya. Sannan za su duƙa su kafa guiwowin ƙafafunsu ɗaɗɗaya a ƙasa, su kuma dafa ƙasa. Daga nan za a ƙirga daga ɗaya zuwa uku. Da zarar an kammala wannan ƙirge yara za su ruga a nakare zuwa wurin taɓawa. Da zarar mutum ya taɓa zai yi ƙoƙarin dawowa da gudu idan tserel ɗin ‘yar zuwa da dawowa ce. Wanda ya riga dawowa duk shi ne na ɗaya. Idan kuma ‘yar zuwa ce kawai, wanda ya riga taɓawa shi ne na ɗaya.
7.12.3 Tsokaci
Wannan wasa hanya ce ta motsa jiki ga yara. A makarantun boko ma akan haɗa wasanni da kuma gasanni da suka shafi tserel.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.