Karin Harshe Na Rukuni: Nazarin Hausar Shafin Makaranta Na Jaridar Aminiya

 Baya ga karin harshen Hausa da ake samu a yankuna daban-dabam na ƙasar Hausa, haka ma ana samun karin harshe na rukunin al'umma daban-daban. Karin harshen rukuni kan samu ne, ko dai dalilin matsayi ko muƙami ko aiki ko jinsi ko addini ko ilimi ko kuma shekaru. Wannan bincike ya yi nazarin wani nau'in Hausa na rukuni wadda ake samu a shafin jaridar Aminiya, mai suna 'Shafin Makaranta Hausa’. Binciken ya yi ƙoƙarin fito da nau'in Hausar da shafin ke amfani da ita tare da ƙoƙarin kawo bambancinta da Hausar da aka saba da ita yau da kullum, wannan shi ya ƙara tabbatar da Hausar shafin makaranta Hausa a matsayin wani nau'in karin harshe na rukuni.

Karin Harshe Na Rukuni: Nazarin Hausar Shafin Makaranta Na Jaridar Aminiya

DAGA

Nazir Ibrahim Abbas
Sashen Koyar da Harsunan Nijeriya
Jami’ar Usmanu Danfodiyo, Sokoto
Imel: ibrahimabbasnazir@gmail.com
 Gsm: +2348060431934

Gabatarwa

Karin harshe wani ɓangare ne na ilimin walwalar harshe a cikin kimiyyar harshe. Karin harshe ya danganci bambancin da ake samu na magana a cikin harshe ɗaya, wanda bai kai ga ya haifar da rashin fahimta kwata-kwata ba tsakanin masu magana da harshen, sai dai ga waɗanda na ‘yan rukunin da ake amfani da shi ba. Ana iya nazarin karin harshe ko ta ɓangaren yanki ko kuma rukuni. Karin harshe na yanki ya danganci bambancin da ake samu a cikin harshe dalilin yanki ko wurin da al'umma suke zaune. Yanki yana iya haifar da nau'in bambancin magana a cikin al'umma masu harshe ɗaya, wanda shi ne ake kira karin harshe na yanki ko nahiya.

Wani nau’in karin harshe, shi ne karin harshe na rukuni. Karin harshen rukuni shi ne wanda ake samu dalilin alaƙa ta rukuni a cikin al’umma. Alaƙar karin harshe na rukuni na iya kasancewa ko dai don shekaru ko matsayi ko ilimi ko addini ko jinsi ko aiki ko kuma muƙami. Wannan rukunin shi ma ya kan haifar da nau’in magana daban, daidai rukunan da muka ambata a sama.

A wannan takardar an yi bincike mai taken: ‘Karin Harshe Na Rukuni: Nazarin Hausar Shafin Makaranta na Jaridar Aminiya’, za a duba wani nau’in Hausa na rukuni wadda ake yi a wani shafin jaridar Aminiya mai suna ‘Makaranta Hausa’. Hausar shafin makaranta ta danganci wani rukunin al’umma keɓantattu da ke matsayin ɗaliban makaranta da malaminsu mai suna Ɗodo’. Ita wannan Hausa, ɗaliban da masu karanta shafin a kai a kai ne kaɗai ke iya fahimtar abin da take nufi kai tsaye. Kalmomin da ake amfani da su a shafin na Hausa ne amma rukunin ɗaliban makarantar da malaminsu ne suke tsara su, suna kuma amfani da su, kuma su ne suka fi sanin hanyar da suke bi wajen ƙirƙiro kalmomin da kuma jumlolin daga cikin Hausar da aka saba da ita.

Sha’awar Hausar shafin ta la’akari da hikimomin da ke ciki, shi ya sa na yi nazari a kan Hausar a matsayin wani nau’in karin harshe na rukuni.

Bayanan da za mu yi amfani da su mun tattara su ne daga cikin jaridu goma sha uku (na makawanni 13) da ke ƙunshe da shafin na ‘Makaranta Hausa’. Shafin yana fitowa a shafi na goma sha huɗu (14) na jaridar ta Aminiya wadda ake bugawa a kowane sati. Mun yi nazarin Hausar kowane shafi daga cikin waɗannan jaridun a lokacin da nake gudanar da wannan binciken.

 

Karin Harshe Da Nau’o’insa

Masana da dama sun bayar da ma’anar karin harshe da kuma nau’o’insa. Wasu daga cikin waɗannan masanan su ne:

Skinner (1977:6) Ya kalli harshe a matsayin – ‘Wani nau’in magana a cikin harshe ɗaya, wanda ba shi ne ainihin harshen ba’.

Crystal (2008:142) Ya bayyana - ‘Karin harshe ko dai na yanki ko rukuni, a matsayin wani nau’in magana na harshe wanda ake iya ganewa ta wasu kalmomi da tsarin harshe (nahawu). Y ace karin harshe mafi yawa yana da tsarin furuci ko nau’in magana da ya bambanta’.

Mathews (1977:56) kuwa ya bayyana: ‘Karin da duk wani nau’in magana na harshe musamman kuma wanda ake magana da shi a wani sashe na ƙasa’.

Sani (2009: 02) ya kawo ma’anar karin harshe a matsayin; ‘Nau’i ne daga cikin  nau’o’in harshe guda wanda ake amfani da shi musamman a wani sashe na al’umma’.

Adeyanju (1989: 39) kuwa ya kawo ma’anar karin harshe- ‘A matsayin yadda mutum ya saba yin magana a cikin gungun al’umma da yawa masu harshe ɗaya’.

Karin harshe ke nan yana nufin bambancin magana da ake samu tsakanin mutane masu harshe ɗaya wanda bai isa ya haifar da rashin fahimta tsakaninsu ba. Duk harshen da ya bunƙasa yana iya samun karin harshe a cikinsa.

Amfani (1993:02) ya bayyana: ‘Nazarin karin harshe (dialectology) a matsayin nazarin yanayin magana na harshen mutane ɗaya, waɗan da ke fahimtar juna, kuma suna da alaƙar hulɗa ta magana’.

 Nau’o’in Karin Harshen Hausa

Karin harshe a Hausa yana da nau’o’i guda biyu; waɗannan kuwa kamar yadda malamai suka bayyana su ne; karin harshe na yanki da kuma karin harshe na rukuni. Karin harshe na yanki, shi ne wanda ake samu dalilin wurin zama ko yankin da al’umma suka fito. A irin wannan hali yanki ko wurin zama yana iya haifar da nau’in magana na daban ga al’umma.

A Hausa kuwa akwai kare-karen harshe na yanki, kamar yadda Bergery (1934), Ahmed Da Daura (1970), Liman (1978), Malka (1978), Amfani (1980, 1993), Zaria (1992), Sani (2003), suka bayyana waɗan da suka haɗa da: Kananci, Sakkwatanci, Dauranci, Zazzaganci, Bausanci, Zamfaranci, Adaranci, Damagaranci, Gobiranci, Kurfayanci, Canganci. Waɗannan kare-karen harshe kuwa ana samunsu ne a yankin Arewacin Nijeriya da Arewacin Jamhuriyar Nijar.

Wasu daga cikin malaman sun rarraba su a matsayin na sashen gabas da yamma ko manya da ƙanana. Yayin da wasu suka kalle su a bisa tsarin tarihin Bayajida.

Ana iya ganin bambancin karin harshe na yanki a dukkan ɓangarorin nazarin kimiyyar harshe tun daga ilimin furuci har i zuwa ga ilimin ma’ana.

A ɓangaren karin harshe rukuni kuwa, Mathews (1977:344) ya bayyana cewa: ‘Nau’in magana ne, wanda ya danganci wani nau’in al’umma ko rukunin wata tawaga ɗaya a cikin al’umma’.

Fagge (2001) Ya yi nazarin karin harshen Hausa na rukuni, inda ya kawo Hausar da ta shafi rukunin al’umma daban-daban wadda ta haɗa da Hausar: ‘Yan siyasa da Hausar gardawa da Hausar ‘Yan ƙadiriyya da Hausar ‘Yan motocin haya da Hausar ‘Yan acaɓa. Bugu da ƙari ya kawo Hausar ‘Yan Sanda da Hausar Makanikai da Hausar Ƙungiyoyin addinai (Ɗariƙa, Izala, Shi’a) da Hausar ‘Yan mata dai sauransu.

Yakasai (2012), Shi ma ya kawo irin wannan Hausa ta rukuni wadda ta ƙunshi Hausar Kasuwanci da Hausar Sarakuna da Hausar Mawaƙa da Hausar Malamai da Hausar Dattijai da Hausar Samari da ‘Yan Mata da Hausar Matan Aure da Hausar Gidana Magajiya da kuma Hausar Wurin Zaman Makoki.

Karin Harshen Hausa na Rukuni

 

Karin harshe na rukuni, karin harshe ne wanda ya danganci bambancin magana da ake samu dalilin matsayi ko aji ko rukuni ko shekaru ko muƙami ko jinsi ko addini ko ilimi ko kuma tarayyar aiki iri ɗaya (a irin wannan yanayi ne ake samun kalmomin fannu, da suka keɓanta ga wani aiki ko ma’aikata).

Wannan nau’in karin harshe ya sha bamban da karin harshe na yanki domin ana iya samunsa a cikin al’umma ko tsakanin mutanen da suke da tarayya ɗaya daga cikin abubuwan da muka ambata a baya na shekaru ko matsayi ko aji ko ilimi ko jinsi ko aiki ko muƙami.

Bambancin da ake samu a irin wannan karin harshe na rukuni bai yi yawan na karin harshe na yanki ba, domin shi wannan ya fi shafar kalmomi ne da ‘yan guntayen jumloli waɗan da rukunin al’ummar da ke amfani da su, sun fi sauƙin fahimtar saƙon da suka ƙunsa.

 
Shafin Makaranta Ɗodorido na Jaridar Aminiya’.

 

Aminiya wata shahararriyar jaridar Hausa ce, wadda kamfanin ‘Media Trust’ da ke da babban ofishinsa a Abuja, ya ke bugawa a kowane mako, jaridar tana fitowa a ranar juma’a ta kowane sati. An fara buga wannan jarida ne, a shekara ta 2006 kuma tana da shafuka arba’in (40) a cikinta.

Kamar mafi yawan jaridu, wannan jaridar ta Aminiya tana da shafukan da suka ƙunshi labarai na gida da na waje da shafukan ilimantarwa da na tallace-tallace da na labaran al’ajabi da rahotanni da kuma shafukan nishaɗantarwa.

Shafin da za mu yi nazari a kansa, shi ne shafin ‘Makaranta Dodorido’ na jaridar Aminiya, wanda shafi ne na, faɗakarwa da ilamantarwa da ke zuwa cikin siga ta nishaɗi. Abin da ya ja hankalina akansa shi ne, Hausar da ake amfani da ita a shafin da yadda ake sarrafata da jujjuyata da ƙirƙiowa da kalmomi abun ban sha’awa, har ya kai ga wanda ba ɗalibin makarantar ba sai ya kasa fahimtar inda aka dosa.

Wannan shafi na ‘Makaranta Dodorido’ a kowane mako yana fitowa a shafi na goma sha huɗu (14) na jaridar Hausa ta Aminiya kuma yana da siga ta nishaɗantarwa da take gudana ta hanyoyi daban-daban. Sigar tana nuna cewa ana isar da wasu saƙonni ne, na ‘yan makaranta.

Tsarin shafin ‘Makaranta Dodorido’ yana tafiya ne bisa tsarin makaranta wadda ke da ɗalibai da malami ɗaya da suke kira Ɗodo’ , wannan ne, ya sa ma akwai surar wani hoto da ba a gane kowane ne ba a saman shafin, a gefen hagu, wanda ga dukkan alamu shi ne hoton Ɗodon’  da adireshinsa na email a ƙasa mai taken ‘turakundodo@yahoo.com’.

Shafin bugu da ƙari yana tafiya ne da tsarin ko dai dodon ya bayar da labari ko kuma saƙon wasiƙu daga ɗaliban makarantar daban-daban da ke jihohin ƙasar nan, waɗan da suke rubutawa don isar da  saƙonninsu. Kowace wasiƙa daga ciki tana ɗauke da take, wanda ke nuna saƙon da ta ƙunsa. Mafi yawan lokuta, shafin ya kan tattauna al’amurran da ake ciki a ƙasar nan a cikin gugar zana da nishaɗi da amfani da wasu kalmomi da jumloli na musamman.

Hausar shafin makaranta dodorido, Hausa ce ta rukunin al’umma wadda ta bambanta da Hausar da saba ji ko yi, yau da kullum. Hausa ce wadda ɗaliban makarantar da malaminsu da masu sha’awar shafin waɗan dake karanta shi yau da kullum kawai ne ke gane ta. A nan muna iya kallon Hausar shafin makaranta dodorido, a matsayin karin harshe na rukunin al’umma ɗaya  wanda kuma ake iya gane siffofin shi, a misalan da za mu bayar na Hausar malamin da ɗaliban makarantar da za mu fito da su a cikin aikin.

 
Hausar Shafin Makaranta Na Jaridar Aminiya

Hausar Shafin makaranta dodorido ta jaridar Aminiya, wata Hausa ce ta daban wadda kalmominta da jumlolinta suka bambanta da Hausar sauran rukunin al’umma. Hausar ta ƙunshi fassara wasu kalmomi da jumloli da sunaye kai tsaye tare da ƙirƙira sababbin wasu kalmomi cikin hikima da fassara wani tunanin al’umma ta hanyar ƙirƙira ta annushuwa da gugar zana. Daga cikin irin nau’in wannan Hausa ta rukuni ne ake samun irin waɗannan ƙirƙirarrun kalmomi da kuma jumloli kamar haka:

Lamba		Hausar Shafin Makaranta		Ma’anarta
1.		Direban Alli		Malami
2.		Zaman Lumana		Zaman lafiya
3.		‘Yan makaranta		Ɗaliban makaranta dodorido
4.		Watsattsakewa da buɗa wagegen littafi		Karatu da rubutu
5.		Taliyar indon-mami		Indomi
6.		Giz-baba		Malamin makarantar
7.		‘Yayan kaji waɗan da ba a ƙyanƙyashe ba		Ƙwayaƙwai
8.		Ƙaramin lauje		Biyu
9.		Masu hannun riga		Mahaukata
10.		Yaron Daku		Jami’in tsaro
11.		Haramta ƙwambo da bobon bokoko		Boko haram
12.		Ɗan bayan kango		Wanda ba ɗan makaranta ba
13.		ShuɗadƊ’iyar shekara		Shekarar bara
14.		Haurobiyawa		‘Yan Nijeriya
15.		Ankararwa		Faɗakarwa
16.		Mai-duka		Allah
17.		Jihar Jijjiga ciyawa		Jihar Jigawa
18.		Shugaba Mainasara		Shugaba Goodluck
19.		Ɗan tallafin suɗin gambiza		Kuɗaɗen rarar man fetur
20.		‘Yan hannu baka hannu ƙwarya		Talakawa
21.		‘Yan-sa-in-ɗauka-ba-tare-da-na-ajiye-ba		Barayin gwamnati
22.		‘Yan sa-mu-raba-da-shi		‘Yan kazagin gwamnati
23.		Tamola da ƙafafun Haurobiyawa		Wasa da hankalin ‘Yan Nijeriya
24.		Wasoson lalita		Satar kuɗin asusun gwamnati
25.		An yi walƙiya mun je gano		Mun gane gaskiya
26.		‘Yan Allah-ba-ku-mu-samu		‘Yan barandar siyasa
27.		Jatau mai-sa-in-sa		Jonathan
28.		Jan jinin Haurobiyawa		Satar dukiyar ‘yan Nijeriya
29.		Batu		Magana
30.		Jatau		Jonathan
31.		Jihar Barnawa		Borno
32.		Kwamin-titi		Kwamiti
33.		Kiran sallah da usur		Abin mamaki
34.		Direban mashahuriya makaranta		Malami
35.		Bijiro		Kawo
36.		Haurobiya		Nijeriya
37.		Niyar-jari		Nijar
38.	Yaren hau-hau wajen hawan sa		Harshen Hausa
39.	Bokan turai na makaranta		Malamin makaranta
40.	Yaren makaranta		Hausar shafin dodorido
41.	Damƙa shi		Kai shi
42.	Kurtun magana		Wayar Gsm
43.	Makaranta ta dodanni		Makarantar dodorido
44.	Saka-ka-tare		Sakatare
45.	Bututun batutuwa		Mai magana da yawun wasu
46.	Malam Dodo/Farfesa Dodo		Malamin makaranta
47.	Wurin ƙwadago		Ma’aikata/Wurin aiki
48.	Harubja		Abuja
49.	Manja		Manaja
50.	Masu hawa sa		Hausawa
51.	Gwamnan Dabawa		Gwamnan Kano
52.	Uwar kowa		Gwamnati
53.	‘Yan caɓawa		‘Yan acaɓa
54.	Romon makaranta		Ilimi
55.	Kwankwatsa-tsiya a birnin dabo		Kwankwasiyya a Kano
56.	‘Yan ƙolaye		Ɗaliban makaranta
57.	Walwalin waliyo a kan Babura		Gudu a kan babura
58.	Bagas		Garaɓasar dumokuraɗiyya
59.	Hana zaburar baburido		Hana acaɓa
60.	Na damo		Haƙuri
61.	Na mujiya		Idanu
62.	Saraf-na-saɗaf		Sanusi Lamiɗo
63.	Walata Ruɗani		Walter Rodney
64.	Kwasar gagarumar jar miya		Sata
65.	Fasko		Gano
66.	Jatau ya jona tantanin mulkinsa		Jonathan ya fara mulki
67.	Dama-dama da kurɗa-kurɗar siyasa		Hada-hadar siyasa
68.	Shekara dubu ƙaramin lauje da sili da ƙaramin lauje		Shekara ta 2012
69.	Zagaye da madambaci da zagaye da manuniyar ƙasa, madambaci da madambaci da manuniyar ƙasa da manuniyar sama ƙaramin lauje da zagaye da manuniyar ƙasa		08098896209
70.	Kwashi-kwaraf		Satar kuɗin gwamnati
71.	Kawun Bararrajewa		Kawu Baraje
72.	Baban-gada-gada mai burga da baragada		Gwamna Babangida
73.	Gwamna mai sunan sulalla		Gwamna Sule Lamiɗo
74.	Gwamna mai kwankwatsa-tsiya a birnin dabo		Gwamna Kwankwaso
75.	Kassara al’umma		Wahalar da al’umma
76.	Ba-haurobiye		Ɗan Nijeriya
77.	Jihar Ni-na-ja		Jihar Niger
78.	Ku-zauna-a-zaure		Kazaure
79.	Garin-ja-haɗe		Garin Haɗeja
80.	Jam’iyya mai ɗan boto da sanda jirge		Jam’iyyar PDP
81.	Shekaru sili da ƙofar hanci		Shekaru 13
82.	Arewatawa		‘Yan Arewa
83.	Kadadawa		‘Yan kudu
84.	Makarantar masu dangwala tawada a kurtu da zayyana a kan allo		Makarantar almajirai
85.	Masu laluben ɗandago da ɗan ƙanzo		Almajirai
86.	Hauren haskaka Haurobiya		Kuɗin wutar lantarki
87.	Hauren-Danja		Niger Delta
88.	Jan linzamin tsuntsayen sama		Tuƙin jigin sama
89.	‘Yan dugwi-dugwi		Yara
90.	Huta-fara		Karatun Firamare
91.	Babban kusu		Barawo

92.	Zagaye da kwanciyar magirbi da zagaye da manuniyar sama da kwanciyar magirbi da manuniyar ƙasa tsayuwa bisa ƙafa ɗaya da kwanciyar magirbi da manuniyar ƙasa da tsayuwa bisa ƙafa ɗaya da tsayuwa bisa ƙafa ɗaya				07067947944
93.	Loma-a-murɗe				Lamurde
94.	In-gwangwaje-in-wala				Ngozi Iweala
95.	Man tunkuza				Man fetur
96.	Ruɓaɓɓen-abban-titi				Reuben Abati
97.	Zage na ‘yan dambe				Zage damtse
98.	Kwana manuniyar ƙasa				Kwana tara (9)
99.	Jihar mu-muka-fara-sharia				Jihar Zamfara
100.	Kurtun baburido				Bayan babaur
101.	Kekerido				Keke
102.	Ranar da aka haifi Ɗanladi da ‘Yar ladidiya				Ranar Lahadi
103.	Mutum mai kallon alƙibla				Musulmi
104.	Amintattar jarida				Jaridar Aminiya
105.	Tunanin gizo da ƙoƙi				Ƙarya
106.	Wadatacciyar sallama				Sallama
107.	Masu bautar mahalicci sili				Masu bautar Sarki ɗaya
108.	Gardawan makaranta				Ɗaliban makaranta
109.	Dodo uban dodanni				Malam Dodo
110.	Romon makaranta/gishirin kyautata rayuwa				Ilimi
111.	Dubannin gaisuwa				Dubun gaisuwa
112.	Malam mai almajirai				Malam Dodo
113.	Bayan kada				Kaduna
114.	Jaridar ‘Yar yau				Daily Trust
115.	Jaridar Turanci ta Gadin yana				Jaridar Guardian
117.	Fura mai kyau				Firamare
118.	Malam Nasara El-rusau				Malam Nasiru El-Rufa’i
119.	Gudun loko				Boyo
120.	Batu na dokin ƙarfe				Batun gaskiya
121.	Jihar Bayasa				Jihar Bayelsa
122.	Janatantin				Jonathan
123.	Gazdawa				Ƙauyawa
124.	Man tunkuza				Ɗanyen mai
125.	Damin hauro				Kuɗi
126.	Barade				Sojoji
127.	Ƙarfe ƙofar hanci da ƙofar hanci da zagaye na yammaci				Ƙarfe 3:30 na yamma
128.	BauɗadƊ’en joji, Sissiliya, Gaulan Jatau				Bode George, Cesiliya, Gulak
129.	Waf-sayoyi				Websides
130.	Mafuskantar alƙiblar kaɗaita mahalicci da ibada				Masallaci
131.	Makarantar dodo uban dodanni				Makaranta dodorido
132.	Ranar da aka haifi Ɗanliti				Ranar litinin
133.	Uwar jiki				Lafiya
134.	Bututun batutuwan jatau mai-sa-in-sa				Mai magana da yawun shugaban ƙasa Jonathan
135.	Shugaban masu ɗamara da launin faɗuwar rana a saman riga				Shugaban jami’an Civil Defence
136.	Shaƙulatin ɓangwaro				Riƙon sakainar kashi
137.	Gidan Bokan Turai				Makaranta
138.	Masu addinin Ɗan Amina				Musulmi
139.	Jihar Tumbin Giwa				Kano
140.	Sarki Sili				Sarki ɗaya
141.	Direban buzu da jan hanjin ligidi ana bugi dutsi kwas				Malamin tsibbu mai jan tasbaha
142.	Babban rumbun adana damin hauro na ƙasar Haurobiya				Babban bankin Nijeriya
143.	Garin Mugurgusa	Garin Gusau
144.	Masu fuskantar alƙibla	Musulmi
145.	Jar boto	Jar hula
146.	Tudun ba ceto	Halaka
147.	Kurtun magana na Halo-Alo	Telfon
148.	Jami’ar Dodorido	Makaranta dodo
149.	Na kuturu	Haƙuri
150.	Abun da ya fi hauka rashin magani	Jahilci
151.	Ci-ba-daɗi	Wahalar da jama’a
152.	Fasa balam-balam	Fasa bam
153.	Dakarun burga	Dakarun JTF
154.	Santala Ƙwaiduwa	Stella Odua
155.	Dokar duniya	Dokar hana fita (Curfew)
156.	‘Yan hana murƙushe gumin Ɗan Adam	Masu kare haƙƙin al’umma
157.	Shekara dubu ƙaramin lauje da sili da ƙaramin lauje da sili da ƙofar hanci	Shekara ta 2013
158.	Bututun ‘yan kwakwazo da baza na mujiya	Kafafen watsa labarai na Rediyo da Talabijin
159.	Bala-lura	Bala’i
160.	‘Yan hana bokoko	‘Yan book haram
161.	Gwamnan asusun ƙarfanfana	Gwamnan babban bankin Nijeriya
162.	Mina-mina a jihar Ni-na-ja	Hada-hada a jhar Niger
163.	Tsomomuwa	Matsala
164.	Jihar Alan-goguro	Jihar Borno
165.	Ɗabi’ar kifi da kada	Wanka
166.	Kwana kwanciyar magirbi	Kwanaki bakwai (7)
167.	Takalmin malam mantau	Mantuwa
168.	Gagarumar garaɓasar dama-dama da kurɗa-kurɗar wasan Samson-siya-siya	Gajiyar Siyasa
169.	Garin gano	Ganewa
170.	Gusha-da-tsaf	Bula Tsaf
171.	Injinmiya	Injiniya
172.	Yaren kuci-kuci-hutawa	Indiyanci
173.	Turkewa a sunnar Manzo	Aure
174.	Birnin Zage-zage	Zaria
175.	Ɗan ku-ci-ku-ba-mu	Mai roƙo
176.	Masu roɗi-roɗin tufa	Sojoji
177.	Hannun zinari da ƙafar gwalagwalai	Masu kuɗi
178.	Mulkin mulaka’u	Mulkin wahalar da al’umma
179.	Shekara dubu ƙaramin lauje da kwanciyar magirbi	Shekara ta 2007
180.	Saɓi zarce na kusu	Sata
181.	Wasan Samson-siya-siya	Siyasa
182.	Unguwar zomo	Uzoamaka
183.	Masu ɗamara da ɗan taku da kulki	‘Yansanda
184.	Ƙaura	Canza wuri
185.	Laluban na koko	Neman abinci
186.	Hausam-fa	Shiyar Hausawa
187.	Gwarawan-fa	Gwarimpa
188.	Ɗunɗume ƙururu	Cin abinci
189.	Likimo	Kwana
190.	Karatun wasiƙar jakin dawa na da birni	Ƙaryar shugabanni ga talakawa
191.	Masu aika-aika	‘Yan ta’adda
192.	Kuturun hasashe	Tunanin banza
193.	Ranar da aka haifi Ɗanladi da Ladi ƙaramin lauje da tsayuwa bisa ƙafa ɗaya	Ranar Lahadi 24 ga wata
194.	Rana ta ƙaramin lauje da ƙaramin lauje ga watan janye-wuri na shekara ta dubu ƙaramin lauje da sili da ƙofar hanci	22-01-2013
195.	Zagaye da madambaci da sili da manuniyar sama da sili da manuniyar ƙasa da tsayuwa bisa ƙafa ɗaya da manuniyar sama da babban lauje da sili da babban lauje	08161946515
196.	Kamfanin cefanar da labarai	Kamfanin dillancin labarai
197.	Makon da ya arce	Makon da ya gabata
198.	Ɗoki-ɗora	Tsarin zaɓen Nijeriya
199.	Mai martaba babban mutum mai rawani	Sarki
200.	Dirshe	Tsaya
201.	Garin dama-tumatur a jihar Yawon-bebe	Damaturu a jihar Yobe
202.	Karɓar na koko	Karɓar cin hanci
203.	Mutum ƙaramin lauje	Talaka
204.	Ƙarfe ƙofar hanci da rabi	Ƙarfe 3:30
205.	Sana’ar zabarin baburido	Acaɓa
206.	Kumbon-tsotso	Kumbotso
207.	Taron-rauni	Tarauni
208.	Ƙurƙurido	A daidaita sahu
209.	Damo-da-kura-da-ɗiya	Dumokuraɗiyya
210.	Malala gashin tunkiya da ‘yan matsabbai	Da yawa
211.	Gandun aika-aika	Ganduje
212.	Hauro dubu ɗari babban lauje	Naira dubu ɗari biyar
213.	Damin hauro sili da zagaye da zagaye da zagaye	Naira dubu goma
214.	Babban lauje da zagaye da ƙaramin lauje da zagaye da sili zagaye da babban lauje	5020105
215.	Ƙasashen da jaɓa da gafiya da kusu ke wandaƙa	Ƙas ashen da ake satar dukiyar al’umma
216.	Takardun ƙwadago	Takardun ɗaukar aiki
217.	Ƙwadagon hana baƙin haure shige da fice	Immigration
218.	Tagadaz	Agadaz
219.	Jihar Ɗakin kara	Jihar Katsina
220.	Masu hawa sa		Hausawa
221.	Yaren Makaranta		Hausa
222.	Masu zama bisa buzu		Malaman tsibbu
223.	Gidan malam Tunau		Makaranta
224.	Gwamnan Dabawa		Gwamnan Kano
225.	Garin da ake sa dara		Kano
226.	Angwance		Aure
227.	Gidan gaskiya		Hanya
228.	Wa-zai-zo-ya-biya		Wazobiya
229.	Sumul		Ƙalau
230.	Ƙaramin lauje da tsayuwa bisa ƙafa ɗaya		24
231.	‘Yan mai tako’ina		Masu hali
232.	Adon gari		Mata
233.	Ta ido		Kunya
234.	Halin amale		Handama
235.	Gobara		Lantarki
236.	In da masu yaen hau-hau wurin hawan sa suke zaune		Mazaunin Hausawa
237.	Wuri sili		Wuri ɗaya
238.	Elin-zubar		Elizabeth
239.	Farcen susa		Babu dama
240.	Masu ƙasƙantar da kai wajen gagara misali		Masu ibada
241.	Ta jiki		Shawara
242.	Sintirtir		Sintiri
243.	Rana ta ƙaramin lauje da manuniyar ƙasa ga watan mayun shekara ta dubu ƙaramin lauje da sili da ƙaramin lauje da sili da ƙaramin lauje		29 ga watan Mayun 2012
244.	Hauro tiren taliya madambaci da gashin balama sili da zagaye da zagaye		Kuɗi tiriliyon takwas da biliyan ɗari
245.	Tunar kilshi			Harakokin duniya
246.	Gaisuwa irin ta masu addinin Ɗan Amina			Sallama
247.	Baba manga			Bamanga
248.	Tada kan adda			Ta’addanci
249.	Jami’an asusun ilimi			Shugabannin Ƙungiyar ASUU
250.	Kamfanin dumdumdurundum			Kamfanin bayar da wutar lantarki
251.	Batu na ingarmar ƙarfe			Gaskiya
252.	Ranar ‘yancin rani			Ranar tunawa da samun ‘yanci
253.	Baba Ojo			Obasanjo
254.	Shugaba ‘Yar bishiya			Shugaba ‘Yar adua
255.	Zaman-takewa			Cutarwa
256.	Watan Noman-baba			Watan Nuwamba
257.	Doguwar dabba			Raƙumi
258.	Watan-dashen-baba			Watan Disemba
259.	Turken rayuwa			Aure
260.	Cefanar			Sayar
261.	Masanin sisi-da-sisi			Gwamnan babban bankin Nijeriya
262.	Zari-ruga			Satar kuɗin gwamnati a ɓoye
263.	Ma’aikatar kula da sufurin tsuntsayen sama			Ma’aikat kula da jiragen sama
264.	Mai gonaki otawa			Obasanjo
265.	Mace da zane			Ministar kuɗi Ngozi Iweala
266.	Lalita			Asusun ajiya (Accaunt)
267.	Tayar-ladan, Malalen-suya, Indon-isiya			Thailand, Maleysia, Indonisia
268.	Niyar-jari, Zaman-gidan-buwai			Niger, Zimbabwe
269.	Damisoshin Asiya			Ƙasashen Asia
270.	Zaɓi-sonka			Zaɓe
271.	Dama-dama-da-kurɗa-kurɗar wasan Samson-siya-siya			Siyasa
272.	Samartakar kusu			Satar dukiyar gwamnati
273.	Uban-mama			Obama
274.	Amari-kowa			Amurika
275.	Dalilin-taronsu			Jaridar Daily Trust
276.	Faffale-dalili			Jaridar Peoples Daily
277.	Balon-faranti			Jaridar Blue Print
278.	Gadin-yana			Jaridar Guardian
279.	Banda-da-gadi			Jaridar Vanguard
280.	Shugaba mai Gudun-loko			Shugaba Goodluck
281.	Uwargida Damo-haƙuri			Uwargida Patient
282.	Jami’an tsoratarwa			Jami’an tsaro na haɗin gwiwa
289.	Raɓaɓas			Rivers
300.	Mai ɗan taku da kulki			Ɗan sanda
301.	Tonon-Anini			Tony Anini

Matanin Wasu Labaran Shafin Makaranta

A wannan ɓangare zan kawo wasu labarai da na tsakuro daga wasu shafukan ‘Makaranta Dodorido’ da ke cikin jaridar Aminiya domin ganin yadda sigar Hausar shafin take.

‘Yar makaranta ki riƙa ɗumama ɗumame da ɗumi-ɗumi

ɓayan gaisuwa da fatar alheri ga babban direban alli na wannan makaranta da sauran ɗalibai, zan taya abokiyar watsattsakewa da buɗa wagegen littafi a wannan makaranta, wacce ta angwance da yaron Giz-baba da fatan Allah ya ba su zaman lumana, kuma muna so ki nuna masa irin horon da kika samu a hannun malam wajen ɗunɗuma ɗumame da ɗumi-ɗumi da kuma dafa taliyar indon-mami da ‘ya’yan kaji waɗan da ba a  ƙyanƙyashe ba’. Aminiya 2012, Febrairu, shafi na 14.

 Hausam-fa ko Gwarawan-fa?

‘A shekara ta dubu ƙaramin lauje da kwanciyar magirbi kamfanin buga Amintattun jaridu ƙasar Haurobiya ya yi ƙaura daga unguwar Mawanawasa kan layin zaratan Zambiya zuwa garin Tako-tako, inda aka gina mana ɗakin katako, mu kuwa muke laluben na koko a ciki. Tun daga waccan shekarar zuwa yau nike ta neman inda Hausam-fa take, domin na san a Harubja da akwai rukunin matsugunnin al’umma mai laƙabin ‘Gwarawan-fa’. Don haka nike ta neman ina Hausawam-fa take, ko kuma rukunin matsugunnin al’umma da aka gina a wannan katafaren birnin inda masu magana da yaren Hau-Hau wajen hawan sa ba tare da sa-in-sa suke bararraje’. Aminiya, 2012, Satumba, shafi 14.

  Kada a rungumi ƙadandoniya

‘Assalamu alaikum ɗaliban wannan makaranta ta mu mai albarka ta Dodorido da ke farfajiyar jarida, sanin kowa ne a rayuwa karɓar abu mai kyau ko maras kyau shi aka fi so ga mutum mai kallon alƙibla, amma a wannan lokaci jama’a sun shiga ruɗani na rayuwa da kallon abin duniya da yin tunanin gizo da ƙoƙi, yawancin mutane zuciyar su ta ƙoƙe kamar ƙoƙiya maza da mata suna tafiya ba kai ba gindi a harkar zamantakewa, kasuwanci da ma sauran al’amurran yau da kullum dab a a faye ɗaukar ƙaddara ba. Kaico duniya rawar ‘yanmata na gaba ya koma baya. Hattara al’umma mu riƙa ɗaukar kaddara idan mun ƙi kuwa mu rungumi ƙadandoniya’.

Daga: Ɗalibar makarantar Tumbin giwa Jamila Ishak (Atinen Ziko) ta garinsu Munyi-jibir, kurtun mangana: zagaye da kwanciyar magirbi da zagaye da manuniyar sama da kwanciyar magirbi da manuniyar ƙasa da tsayuwa bisa ƙafa ɗaya da kwanciyar magirbi da manuniyar ƙasa da tsayuwa bisa ƙafa ɗaya da tsayuwa bisa ƙafa ɗaya da tsayuwa bisa ƙafa ɗaya’. Aminiya, 2013, Afrilu, shafi 14.

1.6 Kammalawa

Wannan maƙala mai taken ‘Karin Harshe na Rukuni: Nazarin Hausar Shafin Makaranta Na Jaridar Aminiya’ ta yi nazari a kan Hausar shafin Makaranta na jaridar Aminiya a matsayin wani nau’in karin harshe na rukuni a Hausa, wanda ya danganci wasu rukunin al’umma da suka haɗu a sigar makaranta, wadda ke da malami da ɗalibai. Shafin kamar yadda muka bayyana a baya ya kan fito ne, ku san kowane mako a jaridar Hausa ta Aminiya kuma ya kan tattauna al’amurran yau da kullum da suke faruwa a cikin al’umma a ƙasar nan cikin nau’in wata Hausa ta daban.

Wannan Hausar kamar yadda misalan da muka bayar suka gabata, Hausa ce ta daban wadda ta keɓanta ga malami da ɗaliban makarantar kawai kuma tana tafiya ne ta sigar Hausantar da kalmomi da fassara wasu tare da amfani da ayyukan wasu mutane ko takensu maimaikon sunayensu. Bugu da ƙari ana kuma ƙirƙiro wasu jumloli da sassan jumlolin Hausa. Shafin musamman yana da tsarin da yake bi wajen bayyana lambobi, wanda sai ƙwararre a irin wannan Hausar ne zai iya fahmitarsu. A tunani na, wannan Hausa idan aka ƙara zurfafa bincike a kanta da wasu makamantanta za ta taimaka wajen samar da nau’in wani harshe na daban wanda zai iya taimakawa wajen sadarwa a keɓaɓɓun wurare, musamman wajen inganta sadarwa ta wasu ma’aikata na musamman ko kuma wurin ayyukan jami’an tsaro a ƙasar nan. Haka ma Hausar tana iya haifar da wani karin harshe babba, wanda za a iya faɗaɗa bincike a kansa.

Akwai buƙatar a yi amfani da basira da ƙwarewar mutane masu irin wannan baiwar ƙirƙira a harshe domin haɓaka harshen da duban yadda za su bayar da gudummuwa ga ci gaban al’umma da ƙasa baki ɗaya. Wannan bincike ya nuna muna cewa harshen Hausa yana iya bunƙasa ta irin wannan hanya har a kai ya haifar da wani harshe a cikin al’umma, idan aka baiwa irin waɗannan mutane masu baiwa ta harshe goyon baya da taimakon da ya dace.
 

Manazarta

Tuntuɓi mai takarda.