Hukuncin Mallakar Miji

𝐓𝐀𝐌𝐁𝐀𝐘𝐀❓

Assalamu Alaikum, Mallam Khamis. Wasu daga cikin mata sukan rubuta wasu surori ko ayoyi a cikin Alkur'ani, sai a buɗe duk wata mimun a sa sunan mijin su ko saurayi da nufin su mallake su. Don Allah, mene ne hukuncin hakan? Mene ne hukuncin wacce ta yi wa mijinta da wacce ta rubuta mata, da kuma wacce ta yi wa wasu hanya aka rubuta musu?

𝐀𝐌𝐒𝐀❗️

Wa alaikumussalam warahmatullahi wabarakatuh.

To wannan irin shaidanun matan sun fada tarkone daga cikin tarkunan bokaye. bokaye ne suke saka rigar malunta sai su dinga ƙarya da Alƙur'ani suna yaudarar mutane, musamman mata, sai suce ki rubuta wasu ayoyi wai wajem mimun sai ki budeshi kamar dai yadda kika fada, to duk wanda za kiji yana baki irin wayannan ababen to ba malami bane, boka ne, kuma sharri ne yakeso ya koya muku. Dan haka sai kuyi watsi da su, so sukeyi su rabaku da Allah su hadaku da shaidan.

Haɗa rubutun Alƙur'ani da sunan miji ko saurayi domin janyo hankalinsa ko soyayyarsa ya yi daidai da abin da ake kira TIWALAH (sihirin soyayya). Manzon Allah (Sallallahu Alaihi Wasallam) ya fada a hadisi ingantacce cewa: "Lallai duba, da laya, da Tiwalah (sihirin soyayya) shirka ne." (Abu Dawud).

Duk abin da mutum zai yi don juyar da zuciyar wani, in dai ba addu'a bace to haramun ne. Idan ana son soyayyar miji, ana yin addu'a ta gaskiya ga Allah, da kyautata masa, da kwalliya, ba tare da an juya hankalinsa ta hanyar asiri ko rubutu na musamman ba.

Babu wani mallakar da za ku samu ta wannan hanyar, ko za ku samu to sai dai kusamu na dan lokaci kafin shaidanun naku su juya baya sai kuma komi ya zo ya lalace kuma.

Ladabi da biyayya da kyautata mu'amala gamida kiyaye dokokin ubangiji sune manyan hanyoyinsa sukesa miji ya ƙaunaceki, kamar yadda Annabi (Sallallahu Alaihi Wasallam) ya ƙaunaci khadijat har bayan mutuwarta, idan yana zaune ya hangi wata daga cikin ƙawayenta za su wuce to shi da kanshi ze tashi yaje ya tarbosu saboda tunawa da abin da ƙawarsu ta yi mishi na kyautatawa, kai sai da takai Annabi (Sallallahu Alaihi Wasallam) yakan shirya abinci na ƙasaita ya yanka rago kawai ya rarrabama ƙawayen khadija, abayan mutuwarta akayi wannan.

Aisha duk ƙaunarda yake mata, sadda tafadi wata magana mara dadi ga khadija, wata guda Annabi (Sallallahu Alaihi Wasallam) ya kwashe yana kausasa mata baƙar magana, shin ke kin isa ki samu irin wannan mallakar da khadija ta yi wa Annabi (Sallallahu Alaihi Wasallam) dan gatan Allah????

 

Toh danme za kije kina ba ta lokacinki agun bokaye suna amshe miki yan kudadenki suna rabaki da tauhidi, kuma na san ba za ki samu rabi-rabin matsayinda khadija ta samu awajen Annabi (Sallallahu Alaihi Wasallam) ba ta dalilin biyayya da take masa, amma ke kuwa kin kama hanyar rabuwa da Allah wanda shi ne yake cusa ƙauna da soyayya tsakanin mutane kin tafi kina nemanta ta hanyarda ba za ki samuba, dan haka lallai mata ku canza tunani.

Kyawawan ɗabi'u da kyautata mu'amala su ne tushe na gaskiya da mutum zai mallake zuciyar abokin rayuwarsa, matuƙar babu kyakkyawar mu'amala a tsakanin mata da miji, to tabbas komin siddabarun da boka zai ba mutum ba zai taɓa samun nasarar mallake abokin rayuwarsa ba, in ma ya samu to na ɗan lokaci ne aka yi masa talala kafin Allah ya kama shi.

sannan kuma ga fuskantar mummunar makoma a wurin Allah ga wanda yake harka da bokaye da ƴan tsibbu, ko da mai harka da bokaye ko ƴan tsibbu ya ga kamar ya ci nasara, to ya sani ba nasara ya samu ba, talala Allah yake masa domin ya turmutsa shi a Jahannama, saboda duk wanda ya mutu yana mu'amala da waɗannan miyagu to lallai zai haɗu da fushin Allah.

Manzon Allah (sallal Lahu alaihi wa aalihi wa sallam) Ya ce "ba ya cikinmu duk wanda yaje chamfi ko kuma akayi masa chamfi, ko ya yi bokanci ko akayi masa bokanci. ko ya yi tsafi ko akayi masa tsafi dominsa. Duk wanda yaje wajen boka kuma ya yarda da abin da ya gaya masa, to ya kafirce wa abin da aka Saukar Wa Annabi Muhammad (Sallallahu Alaihi Wasallam)". (Imamul Bazzar ne ya ruwaitoshi da isnadu mai kyawu).

Don haka duk wacce taje wajen boka aka ba ta wani abu ta yi amfani da shi ko kuma ta sayar wa waɗansu matan sukayi amfani da shi, to tabbas gaba dayansu laifin ya shafesu (wato kafirci kamar yadda hadisin ya bayyana).

Mata kuji tsoron Allah ku fahimci cewa samun mallakar zuciyar miji ta hanyar amfani da layoyi ko kulle-kullen tsafi ba samun yardar Allah bane. Hasali ma hanya ce ta kafirci da gushewar imani. Amma za ku iya samun mallakar mazajenku ta hanyar ladabi da biyayya da girmama miji tare da gyaran jiki da kyautata halaye.

WALLAHU A'ALAM

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.