Hukuncin Karanta Alkur'ani A Cikin Janaba

𝐓𝐀𝐌𝐁𝐀𝐘𝐀❓

Assalamu mal. Khamis shin wanda yake cikin janaba zai iya karanta Alkur'ani ko zai bari ne sai ya yi wankan tsarki?

𝐀𝐌𝐒𝐀❗️

Wa alaikumussalam warahmatullahi wabarakatuh.

Mafi yawan malaman Fiƙhu daga Mazhabobin nan huɗu sun tafi a kan cewa haramun ne ga wanda yake cikin janaba ya karanta Alkur'ani ko ya taɓa shi har sai ya yi wanka tsarki bisa ga wani hadisi da suka kafa hujja da shi cewa babu abin da yake hana Manzon Allah (Sallallahu Alaihi Wasallam) karatun Alkur'ani sai dai janaba. Kuma sun kafa hujja da faɗin Allah a Suratul Waƙi'ah (aya ta 79):

لَّا يَمَسُّهٗۤ اِلَّا الۡمُطَهَّرُوۡنَؕ‏

"Babu mai taɓa shi sai masu tsarki".

Imamut Tirmizhiy ya bayyana cewe: "Wannan fahimtar ita ce maganar mafi yawan ma'abota ilimi daga cikin Sahabbai da Tabi'ai, da waɗanda suka biyo bayansu, kamar su Sufyanut Thauriy, da Ibnul Mubárak, da Assháfi'iy, da Ahmad da Ishaƙ". Sunanut Tirmizhiy (1/195).

Haka nan Alkásániy ya ce: "Ba ya halasta ga mai janaba ya yi karatun Alƙur'ani a wurin gamayyar malamai". Badá'i'us Saná'i'i (1/37).

Shaikhul Islam Ibn Taimiyya ya ce: "Haka nan mai janaba ba zai karanta Alƙur'ani ba a fahimtar mafi yawan malaman mazhabobin Fiƙhu guda huɗu, da ma wasunsu, kamar yadda Sunnah ta yi nuni a kan haka".

Duba Majmú'u Fataawá na Ibn Taimiyya (17/12).

Haramun ne ga mai janaba ya karanta Alkur'ani, ko da kuwa kaɗan ne, har sai ya yi wankan tsarki. Ba a yarda mutum ya taɓa littafin Alkur'ani (Mus'haf) ko rubutunsa ba alhali yana da babban hadasi kamar janaba. Amma yana iya yin zikiri (ambaton Allah), tasbihi, da kuma addu'a a dukkan halin da mutum yake ciki, amma banda karatun kai tsaye daga Alkur'ani.

Ana son mutum ya yi gaggawar yin wankan janaba domin ya koma cikin ibadarsa ta yau da kullum kamar Sallah da karatun Alkur'ani. Amma idan zai jinkirta wankan (misali kafin ya kwanta barci ko ya ci abinci), yana da kyau ya fara yin alwala domin rage kaifin janabar.

Saboda haka ba ya halasta ga mai janaba ya karanta Alƙur'ani har sai ya yi wankan tsarki, wanda kuma ya yi karatu a cikin janaba ya yi kuskure a bisa fahimtar mafi yawan malamai. Kuma wannan ita ce Fatawar da Lajna suka bayar a mujallad na biyar shafi na 429.

WALLAHU TA'ALA A'ALAM

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.