Idan Ina Jin Yunwa Zan Iya Barin Sallah Sai Na Ci Abinci?

𝐓𝐀𝐌𝐁𝐀𝐘𝐀❓

Assalamu Alaikum Mallam. Dan Allah tambaya ne gareni, Dan Allah idan ina jin yunwa Zan iya barin sallah na bari sai na ci abinci?

𝐀𝐌𝐒𝐀❗️

Wa alaikumussalam warahmatullahi wabarakatuh.

A’a, ba daidai ba ne mutum ya bar sallah saboda yunwa. Idan lokacin sallah ya yi, dole ne a yi ta a kan lokaci, domin Allah Maɗaukakin Sarki yana cewa:

​ ۚ اِنَّ الصَّلٰوةَ كَانَتۡ عَلَى الۡمُؤۡمِنِيۡنَ كِتٰبًا مَّوۡقُوۡتًا‏

“Lalle ne sallah tana kan muminai farilla a cikin lokuta ƙayyadaddu.” (Suratun Nisa Aya ta 103).

Amma idan yunwa ta yi tsanani sosai har ba za ka iya yin sallah da nutsuwa ba, sai ka ci abinci kaɗan don rage yunwa, sannan ka yi sallah cikin nutsuwa, ana so mutum ya yi sallah cikin natsuwa ba tare da hankalinsa ya rabu biyu ba.

Wannan uzuri ne na barin sallar jam'i a masallaci ko jinkirta sallah zuwa wani dan lokaci. Amma ba ya halatta ka cigaba da cin abinci har lokacin sallah gaba ɗaya ya fita.

Manzon Allah (Sallallahu Alaihi Wasallam) ya ce: “Idan an kawo abinci, to ku fara cin abinci kafin ku yi sallah, kuma kada ku yi sallah kuna jin yunwa.” (Bukhari da Muslim).

Annabi (Sallallahu Alaihi Wasallam) ya ce: "Idan aka halartar da abincin dare, kuma aka kaddamar da sallah, to ku fara da abincin dare." (Bukhari da Muslim).

Annabi (Sallallahu Alaihi Wasallam) ya ce: "Babu sallah a lokacin da abinci ya halarta (aka ajiye shi), kuma babu sallah ga wanda yake tura abubuwa guda biyu masu kazanta (fitsari ko bayan gida)." (Muslim).

Wannan yana nufin cewa idan abinci yana gabanka kuma yunwa ta yi tsanani, za ka iya cin kaɗan domin samun nutsuwa a cikin sallah. Amma ba wai ana barin sallah gaba ɗaya saboda yunwa ba tare da dalili ba.

Sallah ita ce ginshikin addini, kuma dole ne a yi ta a kowane hali. Ko da mutum yana cikin tsananin rashin lafiya, matuƙar yana cikin hayyacinsa, dole ne ya yi sallah, koda a zaune ne ko kwance.

Manzon Allah (Sallallahu Alaihi Wasallam) ya ce: “Ka yi sallah tsaye, idan ba za ka iya ba, sai ka yi a zaune, idan ba za ka iya a zaune ba, sai ka yi kwance.” (Bukhari)

Haka nan, ko da ana cikin yaƙi mai tsanani, dole ne a yi sallah. Allah (S.W.T) Ya shar’anta yadda za a yi sallah a irin wannan yana yi, kamar yadda Ya ce:

فَاِنۡ خِفۡتُمۡ فَرِجَالًا اَوۡ رُكۡبَانًا ۚ فَاِذَآ اَمِنۡتُمۡ فَاذۡکُرُوا اللّٰهَ کَمَا عَلَّمَکُمۡ مَّا لَمۡ تَكُوۡنُوۡا تَعۡلَمُوۡنَ‏

“Idan kun kasance a cikin tsoro (a fagen yaƙi), to ku yi sallah a ƙafa (cikin tafiya) ko a kan doki. Amma idan kun sami lafiya, sai ku tuna Allah kamar yadda Ya koya muku abin da ba ku sani ba.” (Suratun Baƙara Aya ta 239).

Idan ana iya yin sallah a cikin yaƙi da tsananin rashin lafiya, to babu wani dalili da zai sa mutum ya jinkirta sallah saboda yunwa.

Daga Karshe: Ko da mutum yana cikin tsananin rashin lafiya, dole ne ya yi sallah a duk yadda zai iya yi. Ko da ana cikin yaƙi ko wata matsananciyar rayuwa, dole ayi sallah ko ta yaya ne. Ba a jinkirta sallah saboda yunwa, sai dai idan yunwar ta yi tsanani har tana hana mutum nutsuwa, zai iya cin kaɗan kafin sallah. Wajabcin sallah yana da ƙarfi fiye da buƙatar ciyarwa. Wannan yana nuna cewa babu wani uzuri mai ƙarfi da zai hana mutum yin sallah a kan lokaci, sai idan mutum ba ya cikin hayyacinsa kwata-kwata.

Allah Ya bamu ikon tsare sallolinmu a kan lokaci.

WALLAHU A'ALAM

Zauren Fatawoyi Bisa Alkur'ani Da Sunnah. Zaku iya samun shafinmu ta wannan hanyar...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.