Citation: Gobir, Y.A. & Sani, A-U. (2021). Waƙoƙin Hausa Na Gargajiya. Kaduna: Amal Printing & Publishing Nigerian LTD. ISBN: 978-978-59094-0-01.
6.2 Allah Mun Tuba
Wannan ma waƙar roƙon ruwa ce. Akan rera ta ne yayin da aka samu fari ko rashin saukar ruwan sama da wuri. Yara maza da mata da manyan mata da tsofaffi duk suna rera wannan waƙa. Ga yadda waƙar take kamar haka:
Bayarwa: Allah mun tuba,
Amshi: Allah mun tuba.
Bayarwa: Ya Allah ba mu ruwa mu sha,
Amshi: Allah mun tuba.
Bayarwa: Gero a dawa ya bushe,
Amshi: Allah mun tuba.
Bayarwa: Masara a dawa ta bushe,
Amshi: Allah mun tuba.
Bayarwa: Maiwa a dawa ta bushe,
Amshi: Allah mun tuba.
Bayarwa: Wake a dawa ya bushe,
Amshi: Allah mun tuba.
Bayarwa: Allah ba mu ruwa mu sha,
Amshi: Allah mun tuba.
Bayarwa: Allah mun tuba,
Amshi: Allah mun tuba.
Bayarwa: Ba mu sake zagin ɗan kowa,
Amshi: Allah mun tuba.
Bayarwa: Ba mu sake dukan ɗan kowa,
Amshi: Allah mun tuba.
Bayarwa: Ba mu cin amanar ɗan kowa,
Amshi: Allah mun tuba.
Bayarwa: Allah mun tuba,
Amshi: Allah mun tuba.
Haƙiƙa wannan waƙa tana ɗauke da wani muhimmin saƙo. Wannan kuwa shi ne ra’ayin Bahaushe kan cewa, munanan halayya da ɗabi’u na kawo fitintinu tsakanin al’umma. Daga cikin irin waɗannan fitintinu ko jarabawowi akwai rashin ruwan sama. Saboda haka ne a cikin waƙar ake kawo zancen tuba daga wasu miyagun halaye kamar su zage-zage, da cin zali (duka) da kuma cin amana. Sannan waƙar na ɗauke da jerin sunayen amfanin gona, kamar yadda akan same su a gonar Bahaushe. Wannan ya kasance tamkar wani kundin killace sunayen amfanin gonar Bahaushe. Kuma makaranta ce ga yara wurin koyar waɗannan kalmomi.
){kind=link}
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.