Shin Mace Za Ta Iya Neman Saki?

𝐓𝐀𝐌𝐁𝐀𝐘𝐀❓

Idan ma’aurata suka samu saɓani wajen fahimtar Musulunci; ɗaya daga cikinsu ya taso ne a Yammacin duniya, ɗayan kuma a Gabas, kuma kullum suna yawan saɓani da rigima har ba sa iya cimma matsaya ɗaya, yaushe ne ake ɗaukar ṭalaƙ (saki) a matsayin mafita?

Shin ya zama laifi mace ta nemi saki? Shin za a hukunta ta a Ranar Alƙiyama saboda neman saki? Shin Al’arshin Allah (Arsh na Ar-Rahman) yana girgiza idan aka nemi saki? Wannan shi ne abin da wani miji ɗan Gabas yake gaya wa wata mata da ta taso a Yammacin duniya.

𝐀𝐌𝐒𝐀❗️

Godiya ta tabbata ga Allah, tsira da amincin Allah su tabbata ga Manzon Allah ﷺ.

Mace tana iya neman saki idan akwai ingantaccen dalili na Shari’a. Hadisin da yake cewa saki yana sa Al’arshin Allah ya girgiza ƙirƙirarren hadisi ne na ƙarya.

Sakin mace Musulma daga mijinta lamari ne da Allah ba Ya so, kuma ba abin yabo ba ne. Wannan kuwa saboda matsalolin da ka iya biyo bayan saki da kuma munanan abubuwan da za su iya faruwa sakamakonsa.

Amma idan akwai wata matsala a rayuwar aure tsakanin miji da mata, sakamakon wani aibi ko wasu aibu da ke tattare da ɗaya daga cikinsu ko dukkansu, kamar matsalolin addini, mummunan hali, rashin lafiya, ko wani aibi kamar rashin haihuwa, ko makamancin waɗannan, to saboda rahamar Allah, neman saki ya halatta. A irin wannan yana yin, babu laifi ko haramci a cikin neman saki.

Abin da aka haramta shi ne mace ta nemi saki daga mijinta ba tare da wani ingantaccen dalili na Shari’a ba. An yi gargaɗi mai tsanani game da neman saki ba tare da ingantaccen dalili ba. An ruwaito daga Annabi (SAW) cewa: “Idan mace ta nemi mijinta ya sake ta ba tare da wani dalili ba, to an haramta mata ƙamshin Aljanna.” Imam At-Tirmidhi ne ya ruwaito hadisin, kuma ya ce hadisin hasan ne. (Sunan At-Tirmidhi, 1187.)

Hadisin da ake cewa: “Ku yi aure, kada ku yi saki, domin lalle saki yana sa Al’arshin Allah ya girgiza.” Hadisi ne ƙirƙirarre kuma mai rauni (da’if). (Al-Jami‘ as-Saghir, 2429.)

Allah ne Mafi sani.

Amsawa: Shaikh Muhammad Saleh Al-Munajjid (Hafizahullah) Fassara: Usmannoor Rijiyar Lemo.

Zauren Fatawoyi Bisa Alkur'ani Da Sunnah.

 ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.