Hukuncin Yin Tusa A Cikin Masallaci Da Yin Tusa Yayin Karatun Alkur'ani

𝐓𝐀𝐌𝐁𝐀𝐘𝐀❓

Assalamu Alaikum Malam Khamis. Da fatan ka wuni lafiya. Malam Khamis tambaya ta ita ce mene ne hukuncin yin tusa a cikin masallaci? Kuma mene ne hukuncin wanda ya yi tusa ko ya yi tusa alhali yana rike da Alkur'ani, shin zai ajiye ne sannan ya yi tusa ko zai iya cigaba da rikewa ko cigaba da karanta Alkur'anin ba tare da sake alwala ba? Na gode, sai na ji ka. Allah ba da ikon amsawa.

𝐀𝐌𝐒𝐀❗️

Wa alaikumussalam warahmatullahi wabarakatuh.

Masallaci wuri ne mai tsarki da aka gina domin ibada, zikiri, da karatun Alkur'ani, Saboda haka, bai kamata mutum ya yi sakaci ba wajen fitar da abin da zai takura wa sauran jama'a ko ya ɓata masallaci da wari. Amma idan ta faru ba da gangan ba, ba ta da wani hukunci na haramun ko zunubi.

Idan mutum yana cikin sallah a masallaci sai ya yi tusa, to alwalarsa ta ɓaci, kuma sallarshi ta ɓaci, wajibi ne ya fita ya sake alwala ya kuma maimaita sallar. Amma idan yana shakka ne ko tusa ta fito ko ba ta fito ba, Manzon Allah (Sallallahu Alaihi Wasallam) Ya ce kada ya fita ko ya yanke ibadarsa har sai ya tabba tar da hakan da gaske (da sauti ko wari). Wannan yana zama waswasi daga Shaiɗan.

Hukuncin wanda ya ji tusa alhali yana riƙe da Alƙur'ani shi ne: alwalarsa ta karye, kuma haramun ne ya ci gaba da taɓa Alƙur'anin da hannunsa har sai ya sake alwala. Domin girmama Littafin Allah, mafi yawan malamai (kamar su huɗu da ake bi: Hana fi, Maliki, Shafi'i, da Hanbali) sun haɗu a kan cewa ba ya halatta mutum ya taɓa Alƙur'ani (wato Mus'haf) face yana da tsarki (alwala).

Wanda duk ya ji tusa alhali yana riƙe da Alƙur'ani ya hanzarta ajiye Alƙur'anin a wuri mai kyau kuma mai tsarki ba tare da ka ƙara shafar rubutunsa ko shafukansa kai tsaye ba. Sai ya tafi ya sake yin sabuwar alwala kafin ya dawo ya ci gaba da ɗauka ko karanta Alƙur'anin.

Idan ba ka da alwala, ba za ka iya taɓa takardan Alƙur'ani da hannunka ba. Amma za ka iya juya shafin idan kana amfani da wani abu dabam kamar alƙalami ko kyalle ba tare da fatar jikinka ta taɓa ba. Idan alwala ce kawai ta karye (kamar ta hanyar tusa), ya halatta ka karanta Alƙur'ani akai (daga kwakwalwa) ko ta hanyar dubawa a wayar salula ba tare da alwala ba, domin wayar salula ba ta da hukuncin Mus'haf na takarda.

Idan mutum yana karanta Alkur'ani daga Mushafi (littafi) sai ya yi tusa, dole ya dakatar da karatun, ya rufe Mushafin, sannan yaje ya yi alwala idan yana son ya sake taɓawa da ci gaba da karatu daga gare shi, domin girmama zancen Allah. Idan yana karatu daga zuciya ko ta wayar salula (Phone): Babu laifi ya ci gaba da karatunsa ko da alwalarsa ta warware, domin karanta Alkur'ani ba tare da taɓa Mushafi ba baya buƙatar alwala a matsayin wajibi, kodayake yin da alwalar ya fi cikar kamala. Amma idan kokwanto ne kawai (ba a ji sauti ko wari ba): Alwala tana nan a kankinta, kuma karatun Alkur’ani zai ci gaba ba tare da wani laifi ba.

WALLAHU TA'ALA A'ALAM

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.