𝐓𝐀𝐌𝐁𝐀𝐘𝐀❓

Assalamu Alaikum Malam Khamis ina son yin tsayuwar dare saboda ɗimbin falalar da ta ƙunsa, sai dai a lokuta da yawa, na kan so na tashi amma sai na kasa, to malam khamis ko zaka taimaka min wajan samun damar tsayuwar dare, da shawarwari akan abin da zai taimake ni wajan yin wannan babban aikin?

𝐀𝐌𝐒𝐀❗️

Wa alaikumussalam warahmatullahi wabarakatuhu

Sallar dare (wato Qiyamul Laili) tana daya cikin ibadu mafi girma da daraja a musulunci. Annabi (Sallallahu Alaihi Wasallam) ya ce: "Mafi falalar sallah bayan sallar farilla ita ce sallar dare.

Yin sallar dare (qiyamul laili) yana da falala mai yawa da Allah Ta'ala ya keɓance shi da su kamar yadda ayoyin Alqur'ani da ingantattun hadisan Manzon Allah (Sallallahu alaihi Wasallam) suka tabbatar. Allah Madaukakin Sarki ya yabi mutanen da suke tashi cikin dare domin yi masa sujada da tsayuwa.

A kowane dare, a kashi na karshe na dare, Ubangiji yana sauka zuwa saman duniya yadda ya dace da girmansa. Yana cewa: "Waye zai roke ni na ba shi? Waye zai neme ni gafara na yafe masa?" Wannan ne ya sa sallar dare ta zama mafi kusa wajen samun amsar addu'a.

Don samun nasarar tashi don yin tsayuwar dare (Qiyamul-lail), yana da kyau ka ɗauki matakai a aikace wajen rage nauyin jiki da kuma shirya zuciya da gangar jiki. Akwai abubuwa da Malamai suka yi bayanin cewa suna taimakawa wajan samun damar tsayuwar dare, ga wasu daga ciki:

1. RAGE CIN ABINCI DA YAWA: Cin abinci mai yawa ko nauyi kafin kwanciya yana haifar da kasala da nauyin bacci.

2. BACCIN RANA: Yin ɗan baccin mintuna 30 zuwa 45 da rana yana taimakawa wajen kawar da gajiya tare da ba ka kuzarin tashi da daddare. Hasanul Basary ya wuce wasu mutane a kasuwa da rana, sai yace: "Waɗannan ba za suyi bacci ba?" sai aka ce masa "Eh", sai yace: "Ina ganin darensu ba zai yi kyau ba".

3. KWANA DA WURI: Ka tabbatar ka kwanta da wuri bayan sallar Isha’i domin samun isasshen hutu. Annabi (Sallallahu Alaihi Wasallam) ya karhanta bacci kafin Sallar Isha'i da kuma yin hira bayanta, kamar yadda yazo a Hadisin Muslim mai lamba ta 647, kuma dalilin da yasa ya karhanta yin hira bayanta saboda hakan zai iya hana mutum tsayuwar dare.

4. SAKA ƘARARRAWA (ALARM): Ka saita ƙararrawa (alarm) ko ta wayarka, kuma idan akwai yiwuwa, ka nemi wani aboki ko matarka ko ɗan'uwa mai himma su riƙa tayar da kai. Allah yana saukar da rahamarsa ga miji da mata da suke taimaka wa juna wajen tashi domin yin sallar dare. Idan miji ya tayar da matarsa suka yi sallar raka'a biyu, ana rubuta su a cikin rukunin maza da mata masu yawan ambaton Allah.

5. NISANTAR ZUNUBAI: Fudhail bn Iyadh yana cewa: "Idan kaga ba ka iya tsayuwar dare, to ka tabbatar zunubai ne suka dabaibaye ka".

6. NISANTAR YIN AIKI MAI WAHALA DA RANA: Nisantar yin aiki mai wahala da rana ko abin da zai kawo maka fargaba a cikin zuciya, ta hanyar rage burirrika da tunanin abin da ya wuce.

7. NEMAN TAIMAKON ALLAH (ADDU'A): Ka roki Allah Ta'ala da ya ba ka ikon tashi don bauta masa da tsarkakakkiyar niyya. Ka aikata ladubban bacci yayin kwanciya, ta yadda zaka karanta abin da yazo a cikin Sunnah na addu'o'i da ladubban bacci.

8. FARAWA DA KAƊAN-KAƊAN: Kada ka ɗora wa kanka nauyi mai yawa. Ka fara da raka'a biyu kawai ko da a kowace rana ne, sannan a hankali sai ka riƙa ƙarawa.

Idan har ka kiyaye waɗannan, da izinin Allah za ka dinga tashi sallar dare (Qiyamul-lail). Ina fatan Allah ya datar da mu gaba ɗaya zuwa wannan ibada mai girma.

WALLAHU A'ALAM

Zauren Fatawoyi Bisa Alkur'ani Da Sunnah.

  ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.

Question and Answers in Islam