Adashen Mata A Garin Gusau (6)

Kundin Binciken Neman Digirin Farko (B.A Hausa) Wanda Aka Gabatar A Sashen Harsuna Da Al’adu, Jami’ar Tarayya Gusau.

Adashen Mata A Garin Gusau (6)

NA

AMINA ABUBAKAR

 

BABI NA BIYAR

KAMMALAWA

5.0 GABATARWA:

A wannan babi za a naɗi dukkan abubuwan da aka binciko a kan wannan aiki tare da yin nazarin kowane babi ɗaya bayan ɗaya domin kawo su a taƙaice, wato a ƙarƙashin taƙaitawa. Hakazalika, a nan ne za a kammala wannan aiki gaba ɗaya.

 

Bugu da ƙari, cikin babin ne za a ga shawarwarin da aka bayar ga ‘yan uwa ɗalibai, da manazarta da masu sha’awar wannan harshe na Hausa, haka kuma da irin sakamakon binciken da aka samu wajen gudanar da wannan bincike. A ƙarshe ne za a yi bayanin kammalawa tare da manazarta.

 

5.1 SAKAMAKON BINCIKE:

Kamar yadda muka sani cewa komai na duniya yana da sakamako, ga dukkan abin da bawa zai gudanar a rayuwar yau da kullum to lallai ne sai ya samu sakamakon abun nan, mai kyau ne ko marar kyau, to wannan bincike shi ma akwai wasu abubuwa da aka gano ta dalilin sa, waɗannan abubuwan sun haɗa da:

1.      A ƙarƙashin wannan bincike mun gano dalilan da suke sa a gudanar da bincike, tare da gano muhallin bincike ga malamai har zuwa ga ɗaliban ilimi.

2.      A ƙarƙashin wannan bincike mun gano irin muhimmancin da sana’a take da shi a cikin rayuwar al’umma, a inda muka ga cewa muhimmancin sana’a yana raya al’adun gargajiya, misali idan aka dauƙi sana’ar sassaƙa da dukanci za a tarar tana raya tare da adana wasu al’adun Hausawa na gargajiya.

3.      A ƙarƙashin wannan bincike mun gano ma’anar adashe daga bakin wasu masana da kuma Shehunan malamai, a inda muka samo ma’anoni daban-daban.

4.      A ƙarƙashin wannan bincike mungano ire-iren adashen gargajiya wanda muke da shi da kuma yadda ake gudanar da shi a cikin al’ummar Hausawa.

5.      A ƙarƙashin wannan bincike mun gano su wa ke gudanar da adashe, a inda muka ga cewa mata su ne waɗanda suka fi gudanar da adashe, da kuma ‘yan kasuwa, kamar irin su masu sayar da fata, masu kanikanci, ‘yan kasuwa da sauransu.

6.      Duk a cikin wannan bincike mun ga yadda ake gudanar da adashe a garin Gusau, haka kuma mun gano wace ce uwar Dutsi.

7.      Wannan bincike ya sa mun gano yadda ake zubin adashe da kuma hanyoyin da ake bi wajen zubin da ranakun zibi ga ma su adashe. Bugu da ƙari mun ga yadda ake kwasar adashe, da kuma kuɗin da ake baiwa uwar adashe.

8.      Daga ƙarshe mun ga irin muhimmancin da adashe yake da shi, da irin alfanun da ake samu ga masu yin sa, haka kuma mun ga irin illolin dake ƙunshe cikin adashe.

A nan mun ga irin sakamakon da aka samu ta dalilin wannan bincike, domin an gano abubuwa da yawa a cikin wannan bincike.

 

5.3 SHAWARWARI:

To, a nan shawarwarin da za a ba da, ba su wuce na malamai da ɗalibai masu nazarin harshen Hausa da masu magana da harshen. Shawara ta farko ita ce, malamai da ɗaliban harshe su ci gaba da irin wannan nazarin saboda muhimmancinsa, ta irin wannan bincike ne za a gane bakin abubuwan da suka shigo.

 

Haka kuma, yana da matuƙar muhimmanci hukumar makaranta ta sanya wannan bincike a cikin tsarin bincike da ake rubuta maƙala a kansa, idan muka yi la’akari da muhimmancinsa. Domin ya taɓo ɓangarori na rayuwar Bahaushe tamkar dai muna iya cewa adashe wata hanya ce da ake amfani da ita wajen cimma wani buri da mutum yake son cimma, waɗanda suka shafi abubuwan buƙatar rayuwa na amfani da kuma abubuwan sana’a, waɗanda suka haɗa da faɗaɗa jari idan ya yi ƙasa, da kuma ƙaro kayan sana’a domin kasuwanci ya ƙara bunƙasa, da sauran abubuwa makamantan waɗannan.

 

Bayan nan kuma, gwamnati ita ma ya kamata ta sanya wannan adashe a cikin manhaja ga ɗalibai tun daga firamare har zuwa jami’a, a cikin darussan da ake karantar da ɗalibai kamar yadda ake karantar da Karin magana, da habaici da tatsuniya da waƙa da adabi, shi ma adashe ya kamata a ce ana karantar da shi domin muhimmancinsa da alfanun da ake samu a cikin sa, da kuma irin taimakon da yake ba da wa ga rayuwar Bahaushe da kuma al’ummomi daban-daban masu gudanar da shi.

 

Daga ƙarshe kuma ya zama dole ɗalibai masu nazarin harshen Hausa a matakai daban-daban kama daga masu neman takardar shaidar malanta wato (NCE) da masu karatun digiri na 1 da 2 da 3, su tsunduma a sha’anin bincike a kan adashe, ta hanyar rubuta kundayensu na kammala karatu a kan wannan sha’ani na yadda ake gudanar da adashe a Bahaushiyar al’ada.

 

5.4 KAMMALAWA 

A babi na farko wannan aiki ko bincike an yi cikakken bayani ne game da manufar wannan bincike, da dalilin gudanar da bincike, da muhimmancin bincike, haka kuma, an yi bayani a kan hanyoyin da aka bi wajen gudanar da wannan bincike, da kuma muhallin da wannan bincike ya ƙunsa, haka kuma an yi bayani a kan hujjar ci gaba da wannan bincike. A ƙarshen babin an yi bayani a kan bitar ayyukkan da suka gabata, sai kuma bayanin kammalawa.

 

Babi na biyu wato an yi tsokaci a kan taƙitaccen tarihin garin Gusau, inda muka yi bayani a kan yadda garin Gusau yake a taƙaice, da kuma ire-iren sana’o’in da mutanen Gusau suke yi a gargajiya, waɗanda suka gada tun daga kaka da kakkanni, haka kuma a cikin babin an yi bayani a kan muhimmancin sana’a, misali irin su bunƙasa tattalin arziki, samar da abin masarufi, samar da aikin yi, haifar da wasu sana’o’i, samar da magunguna na musamman, raya al’adun gargajiya, tare da yin bayaninsu ɗaya bayan ɗaya. Daga ƙarshe babin, an yi bayani na kammalawa.

 

Babi na uku kuwa shi ne babin da aka yi magana a kan ma’anar adashe. Inda muka yi bayani a kan irin yadda masana suka yi bayani a kan ma’anar adashe, da kuma hasashensu a kan tarihin samuwar adashe, kazalika duk a cikin babin, an yi magana a kan su wa ke gudanar da adashe, tare da rabe-raben adashe, inda daga ƙarshe aka kammala babin.

 

Babi na huɗu an tattauna a kan muhimmancin abubuwa kamar haka; adashe a garin Gusau, uwar dutsi, zubin adashe, kwasar adashe. Haka kuma, mun yi tsokaci a kan muhimmancin adashe ga al’umma, da irin alfanun da ake samu a cikin adashe, haka kuma duk a cikin babin mun yi duba zuwa ga illolin dake ƙunshe cikin adashe tare da yin bayani. Daga ƙarshe muka yi bayanin kammalawa.

 

Babi na biyar, mai suna kammalawa, wato kammala aikin ne gaba ɗaya, an kawo sakamakon bincike, shawarwari da kammalawa, daga ƙarshe baki ɗaya manazarta.

MANAZARTA

Tuntuɓi Amsoshi.