Wannan bincike mai taken “Tauri Ko Barazanar Siddabaru: Nazarin Siddabarun  Cikin Wasan Tauri,” an gina wannnan binciken ne a bisa la’akarin da yadda ‘yan wasan tauri ke yin   siddabaru a wajen wasan. Binciken ya fayyace yadda ‘yan wasan tauri ke gudanar da siddabaru a filin wasan da yadda suke harhaɗa kayan yin siddabaru kafin su shiga filin wasa. An keɓe wannan bincike ne a ƙasar Kabi wato gundumar Argungu. An yi amfani da hanyoyin hira da ‘yan tauri da ‘yan tauri masu aiwatar da wannana siddabaru a wajen wasar tauri. Wannan bincike ya sami nasarar tattaro wasu abubuwa daga cikin siddabarun ‘yan tauri. Bincike ya fito da nau’o’in siddabarun da ake gudanarwa a cikin wasan tauri, tare da abubuwan da ake amfani da su a wajen nuna barazana da nuna gwaninta har ma da burgewa a idon ‘yan kallo
Tauri ko Bazaranar Siddabaru: Nazarin Siddabaru A Cikin Wasar Tauri A Ƙasar Kabi
Lauwali Aliyu

Gabatarwa
          Ƙasaar Hausa tana ɗauke da ɗinbim jarumai masu nuna jaruntaka a duk inda suka sami kan su ta fannonin rayuwa daban-daban, haka ma, ta ɓangare tauri ba a bar su a baya ba, domin wannan fannin ne da suke nuna waibuwa ta amfani da ƙarfe da abubuwan da suka shafi kaifi ko tsini. Waɗanda suka shahara a wannan ɓangaren suna cikin shirin ko-ta-kwana, sai dai Allah ya kau da ɓacin rana. Saboda muhimmancin wannan ɓangaren shi ya haifar da yin bincike a kan barazanar siddabaru da ‘yan tauri ke amfani da ita a wajen wasa, domin nuna burgewa da kuma ɓatar da hankalin ‘yan kallo.

Kadadar Bincike
          Ba burin wannan bincike, binciko siddabaru a al’ada ba. Binciken ba ya da ƙudirin taɓo komai na siddabaru a al’adun Hausawa balle sanin yadda ake aiwatar da siddabaru a wasu sana’o’in Hausawa ba. Kadadar bincikena ita ce: Tauri Ko Barazanar Siddabaru: Nazarin Siddabaru Cikin Wasan Tauri Kabi. Yaya ‘yan tauri ke aiwatar da siddabaru a wajen wasan tauri? Binciken ya taƙaita ga abin da ya shafi siddabaru a cikin wasan tauri kawai. Fatana wannan takarda ta zama mabuɗi ga yin wasu bincike masu amfani a kan siddabaru a wasu al’adun Hausawa. Muhalin wannan bincike shi ne ƙasar Kabi wadda ta shfi Argungu da Augi da Arewa da kuma Dandi

Dabarun Bincike
          Daga cikin matakan da na hango za su kai ga nasarar wannan aiki akwai bitar ayukkan da suka gabata. An dai ci karo da wasu ayukka da aka yi a kan tauri da siddabaru, amman ba a taɓi abin da ya shafi siddabarun ‘yan tauri ba. Zuciya ƙudirin wannan aiki ban ga wurin da wani ya ambaci siddabarun ‘yan tauri ba. Don haka tilas in dogara ga yawon rangadi tsakanin ‘Yan tauri da Maƙera har ma Gardawa, domin samun ingantattun bayanai.

Ra’in Bincike
            A ‘yan karance-karencen da bincike na ci karo da ayukkan Bunza (2018 da 2019), inda ya jajirce a kan amfani tare da ɗora ayukkan bincikenmu a kan Bahaushen ra’i mai taken “ Gwanin abu mai yin sa”. Wannan karin yana magana ne a kan nuna gwaninta da ƙwarewa a cikin aikin da mutum ya saka kansa. Manufa ita ce a ba bincike dama ya yanke hukunci akan abubuwan da aka gano. Da mai ganin haka ne gwanin abu mai yin sa da mai musantawa duk maganin su a aikata a gani.

Ma’anar Tauri
          Bunza ya bayyana tauri da cewa
“ Tauri dai maganai ne da ya samo asali daga taurin jiki, watau mai irin maganin jikinsa zai yi wa ƙarfe tauri, ba ya fasa shi”.
A wani bayani yana cewa:
            “Asalin Kalmar tauri daga “Tauri” take mai nufin abu ya ƙi fasuwa. Ko ya ƙi bari a sarrafa shi ta yadda yake so. Ko mutum ya faye ƙin karɓar shawara, akan ce wane taurin kai gare shi. Mai irin wannan asiri na maganin ƙarfe ana kyautata zaton wuƙa, da takobi da mashi da duk wani makami na ƙarfe ba su fasa jikinsa. Haka kuma, yana iya sarrafa ƙarfe yadda yake buƙata, ba tare da wata wahala ba.
A hirar da na yi da wasu’yan tauri sun bayyana ma’anar tauri kamar haka:
            Tauri, ma’anar tauri, wani abu ne na tsaron jiki, maganin ƙarfe ya zamana ko a bakin ka kana tafiya ka haye masa ko ya haye maka, ko a ishe ka, ko kuma kai da kan ka ka yi niyyar faɗa da wani tau duk abin da sara ma ko ya soka maka ba za  ya kama ka ba.

Ma’anar Siddabaru
            A ɓangaren lugga, Kalmar siddabaru, kamar Bargery (1934:938 da 946) ya nuna a kats, sakki: siddabaru, kn: suddabaru, a daidaitacciyar Hausa: siddabaru, tana nufin dabo. Shi kuma ƙamusun Hausa (CNHN, 2006:395) ya nuna kalmar siddabaru ita ce wasu dubaru na sihiri da suka wuce fahimtar hankalin ɗan adam, sannan kuma Kalmar siddabaru tana iya zama dabo ko rufa-ido.
            Idan aka kalli Kalmar siddabaru ta fannin ilmi kuwa, masana al’ada da rayuwar ɗan adam sun bayyana ta ta fuskoki daban-daban. A wata ma’ana ta isɗilahi kalmar siddabaru tana nufin dubaru cukurkuɗa abubuwa da rikirkita su tare da ɓatar da bakin zare har a kasa gane lissafi. Wani lokaci tana nuni a kan wayo da dabara wajen kare kai ko kuɓatar da kai tare da yin layar zana. Wasu kuma suna ganin, siddabaru ya ƙunshi yin surkulle da ɓatar da sau da kau da gani a samar da abubuwa ko a gudanar da wasu ayyuka na ban mamaki.
            Domin haka, siddabaru yana nufin sanin yadda za a yi wasa da hankalin mutum har ya yi mamakin yadda abubuwa ko ayyuka suka faru. A wannan madosa za a daɗa faɗaɗa ilimin siddabaru ya haɗa da fasaha da azanci da dibilwa da rufa-ido da srukulle da dabo da sihiri da saɓa-al’ada da makamantan waɗannan abubuwa. Ta waɗanan hanyoyi ne ake yin siddabaru da cakuɗe-cakuɗen abubuwa domin a gigitar da hankalin mutane ta yadda duk mutum ya kai ga wayo ko ganewa sai an shigar da shi duhu.    

Siddabarun Yanke Kwalba Da Kuɗi
            Wannan wani siddabaru ne da ‘yan tauri ke aiwatarwa a wajen wasa a yi amfani da kuɗi a yanka kwalba. ‘Yan tauri suna amfani da wani turare ne da kaɗa, wato auduga, sai a lauya kaɗar a tsakiyar kwalbar, sai a sa zare a lauye yadda kaɗar ba za ta fita ba, a zuba turaren ya kewayo kaɗar ba da yawa ba, duk yada kaɗar ta sami turaren to ya wadatar, sai a sami kalanzir wato barahuni ko fetur, shi ma za a zuba wa kaɗar ya zagayo, daga nan za a kunna wuta, idan ta kama da wuta, za a bari sai kaɗar ta cinye, sai a goge baƙin da kwalbar ta yi da an goge za a ga kwalbar ta tsaye a daidai inda aka lauye kaɗar. Daga nan za a riƙa kula da kwalbar saboda koyaushe tana iya fashewa ta rabu biyu.
            Idan ɗan tauri zai shigo filin wasa, to zai aje kwalbar tsaye a ƙasa, sai ya zuba mata ruwa sai ta cika, idan zai zube ruwan sai ya riƙe tsakiya ya karkata kwalbar a hankali ya zube ruwan, idan ya zube sai ya kira wani ya ce ya riƙe kwalbar, sai ɗan tauri ya ɗauko naira biyar ko naira goma, ya ce zai yanka kwalbar da kuɗin, to ɗan taurin zai shirya da kuɗin sun kai ga kwalbar to zai ɗan tanƙwara kwalba ƙasa saboda ƙasan ya fi nauyi kuma mutane ba za su gane ya tanƙwara kwalbar ba.
            Haka kuma a hirar da na yi da Kabiru Aliyu (Ƙaro), wanda aka fi sani da Uban Dawakin  Augie ya ce: Siddabarun yankan kwalba da kuɗi wata dabara ce da ‘yan tauri ke amfani da ita wajen aiwatar da siddabarun, idan ɗan tauri yana son ya saka kuɗi ya yanke kwalba da su, to zai sami wani haki a ranar Lahadi kowane lokaci, duk gutsun da ya riƙa zai karanta masa tahiya, sai ya cire, sai ya sami gutsu bakwai, sai a saɓa shi a shanya da ya bushe a dake shi a ɗebe garin, za a sami zaren ɓartake, (Zaren kaɗa), sai a lauya wa kwalbar zaren sau uku, za a sami barahuni wato kalanzir a zuba shi ga wannan zaren da aka lauya wa kwalbar, amma kaɗan ba da yawa ba, sai a kunna wa zaren wuta.
            Idan wutar ta gama ci sai ya saka wa yatsansa yawu ya taɓo maganin sai ya aza maganin saman kwalbar daidai inda ka kunna wa wuta, da zarar maganin ya taɓi inda zafin yake to za ka ji kwalbar ta yi ƙara, idan ta yi ƙarar to da zarar ka duba za ka ga kwalbar ta tsage daidai wurin da ka aza wannan zaren da ka ƙona.
            Za a sami ƙyalle a goge wannan dattin na wuta, idan ya zo wajen wasa za ya baiwa wani ya riƙe kwalbar da zarar ya riƙe kwalbar shi da yasan abin da ke faruwa, za ya aza kuɗin daidai inda kwalbar ta tsage, amma shi zai ɗan tanƙwara kwalbar kaɗan to lokacin za ta yanke.

Siddabarun Rawa Kan Kwalba
            Wannan wani siddabaru ne da ‘yan tauri ke amfani da shafi, wato shafa wani magani saboda  kada kaifin kwalbar da za su yi rawa saman ta ya kama su. Ana haɗa wannan maganin da ban wata itaciya, wato ɓawan jikin itaciyar da jar kanwa, sai a haɗa su waje ɗaya a dake, a sami mankaɗe a kwaɓa garin maganin da mankaɗe, idan ɗan tauri zai je wajen wasa, sai ya safa wa ƙafafunsa ko hannuwansa ko kuma duk inda yake buƙata a jikinsa. Idan ya gama shafa wa, to zai sami kwalabe kamar guda ashirin ya farfasa su, ya je da su wajen wasa da zarar an tayar da shi to zai fito da kwalaben a filin wasa ya zuba su a kan jikar da ya zo da kwalaben, sai ya hau kan kwalaben yana rawa akai ko ya kwanta a kan su, zai dai yi duk yanda yake buƙata, in sha Allahu ba kwalbar da za ta yanka shi.
            Haka kuma ana samun ‘yan taurin da ke amfani da ƙayar aduwa, za a saro ƙayar aduwa mai yawa ya zo da ita a filin wasa a aje ta, to ɗan taurin da zai yi wasa da ita zai cire tufafinsa ya hau ƙayar ya yi rawa ko ya kwanta a kan ƙayar ko ya jawo ta wannan gefe da wannan gefen ya rufa ta a jikinsa ya kama mulmula a cikin ƙayar, har ya gama wasa, ba za a sami ƙayar da ta shiga jikinsa ba da ikon Allah.

Siddabarun Kallar Adda
            ‘Yan tauri suna da siddabarun da suke yi a lokacin wasa idan za su ƙalle adda. Za a kai adda maƙera inda wanda ya saba da yi musu aiki, ya ƙona addar ba tare da lambar addar ta ƙone ba, saboda ana zuba ƙasa mai sanyi ko busassa a kan lanbar , za a bar addar cikin wuta sai tayi ja, sannan a fitar da ita a saka ta cikin  ruwa masu wani garin maganai, sai ta sha ruwa sosai, to idan addar ta ƙonu tun nan wata za ta kare wata kuma za ta tsage. Idan an gama za a sami sanfefa mai garje da mai sulbi, a zauna a goge su duka, za su koma farare kamar ba a taɓa ƙunar su ba, saboda a gusar da tunanin ‘yan kallo.
            To ɗan tauri da zarar ya zo wajen wasa, aka fara kirarinsa zai fito da addunan ya riƙa karya su, kuma ba wata gaddama duk yanda yake buƙata, to haka zai karya waɗannan addunan da ikon Allah.             

Siddabarun Kallar Yuƙa
            ‘Yan tauri suna yin siddabarun na ƙalle yuka a wajen wasa, wanda wasu mutane suna ganin abin nan kamar gaskiya ne, amma ana bin waɗansu hanyoyi ne domin a ɓatar hankalin jama’a ko ‘yan kallo.
            Ana gudanar da wannan siddabaru ne, ta hanyar samun guntayen addar da aka karya wajen wasar tauri, sai a kai wa maƙeri ya yi amfani da su, ya sarrafa su ya mayar da su yuƙaƙe, bayan ya gama sai ya yi musa ɓotoci na itace da an gama yi musu ɓotoci, za a dawo a koma ƙonasu cikin wuta sai sun yi ja, sannan a fitar a saka su cikin ruwan magani da sun huce, za a sami sanfefa mai garje da mai sulɓi a zauna a goge su, su koma kamar sababbin yuƙaƙe, idan an ƙare ɗan taurin zai zo ya karɓa, ya je da su wajen wasa, da zarar an tayar da shi wato in an fara yi masa kirari, to zai fito filin wasa da wuƙaƙe aƙalla guda huɗu ko biyar ya karya su lokaci ɗaya ba tare da an sami wata matsala ba.

Siddabarun Kallar Kwasa (Hauya)
            ‘Yan tauri suna yin siddabaru a wajen wasa na ƙalle kwasa, domin gusar da hankalin masu kallo. A wannan siddabaru ana yin tsabar kwasa da sifirin na mota, wato ɗan tauri zai samo sifirin na mota ya kai wa maƙera su ƙona shi a wuta sai ya yi ja, a mayar da shi tsabar kwasa, sai a saka mata ɓota ta icce, bayan an gama kwasar, za a bata wuta sai tsabar ta yi ja, sai a ɗauko tsabar a saka cikin ruwan magani da ta sha iska sai a mayar da ita a ɓotar ta. To da an gama ɗan tauri zai zo ya karɓa ya je wajen wasa to duk yanda yake so zai yi da ita, da zarar ya buge ta da hannu to za ta karye ko ya buga ta ga wani abu duk za ta karye, da yaddar Allah.
Siddabarun Kallar Karfe Sifirin
            A wajen ƙallar ƙarfen sifirin ‘yan tauri suna yin siddabaru, domin gusar da tunanin ‘yan kallo. Ana amfani da wani haki ne, za a shanya shi ko bai bushe duka ba ayi  amfani da shi ba matsala, sai a daka shi a sami ruwa a zuba shi da ya yi kamar minti biyar, sai a sami sifirin a saka shi cikin wuta sai ya yi ja, a ɗauko shi da sauri a kaɗa cikin ruwan nan na hakin da aka daka, idan ya huce, sai a fitar da shi, to da zarar ɗan tauri ya je wajen wasa yadda duk yake so ya yi amfani da shi zai yi, idan ya ga dama zai buga ƙarfen a, jikinsa ya karye ko ya ja sa, to duk zai kare, kuma ba guntu ɗaya zai yi ba, sannan idan ɗan kallo ya ɗauka ba zai gane komai ba, saboda duk guntun da ya kare to ba za a sake iya kare shi ba, kuma ba zai gane komai ba.

Siddabarun Ƙallar Adda Ba Tare Da An Ƙona Ta Ba
            Akwai siddabarun da ‘yan tauri ke yi na ƙallar adda, ba tare da an ƙona addar da wuta ba. Suna amfani da maganin kaji ne, a wajen gudanar da wannan siddabaru, idan ɗan tauri zai yi wasa yau ko gobe to zai shafa wa adda wanan maganin, ya shanya ta, ya bayar da kamar minti biyar, sai ya ɗauko addar ya shafe, saboda yakan yi  ja a jikin addar sai ya sami sanfefa ya goge addar yanda ba wanda zai gane ya shafa wani abu, to idan ya je wajen wasa zai yi wa wannan addar ƙallar da yake buƙata, kuma ba abin da zai faru.

Siddabarun Yi Wa Adda Magana
            ‘Yan tauri suna yin siddabaru na yi wa adda magana kuma mutane ko ‘yan kallo suna ganin kamar abin gaskiya ne, saboda za a ce adda ta gaida mutum, kuma ta lanƙwasa wajen wanda ake da buƙatar ta gaida, idan an ka ce ta taso kuma za ka ga ta lanƙwaso ta tashi, tamkar tana karɓar umurnin da ake bata ne.
            Hasali wannan addar akwai abubuwan da ake shafa mata, domin gudanar wannan wasar, idan ɗan tauri yana buƙatar  amfani da wannan addar to zai sami waɗannan magunguna, a shafa mata, yadda ba za a gane an shafa mata wani abu ba, idan an ƙare shafa mata abubuwan da ake buƙata, to za a sami shanfefa mai sulɓI a goge duk abin da aka shafa, saboda kada ana gane.
            Idan ɗan tauri zai yi wasa da adda a filin wasa, zai ɗauko ta ya tayar da ita, to zai saka yatsun sa ya tare addar ko ya tura addar ko yana yi yana lanƙwasa hannunsa, to a wannan lokacin duk abin da ya ce addar ta yi mutane za su yi tunanin tana karɓa umurnin da ake bata ne, saboda ba addar an riga an yi mata wasu siddabaru, duk yadda yake so zai yi da ita. Saboda haka da ya ce adda je ki gaida Sarki to zai saka yatse ya tura addar gefen da Sarki yake, kuma za ta tafi da zarar ya ce adda tsaya, kuma za ta tsaya saboda zai saka ɗan yatsa ya tare ta. Idan an gama wasa da addar to za a barta haka nan ba tare da an sake tada ta  ba.
            Haka kuma duk ɗan taurin da ke wasa da adda to ɗaya ce yake amfani da ita, idan ta sami matsala sai ya sake wata irin ta. Wannan siddabaru yana bai wa ‘yan kallo sha’awa da ban mamaki.

Siddabarun Fitar Da Ruwa A Lauje
            ‘Yan tauri suna yin siddabarun fitar da ruwa a lauje a wajen wasa, domin nuna barazana da burgewa a idon ‘yan kallo, wannan yana gusar da tunanin ‘yan kallo.
            Ana amfani da wasu hakukuwa ne a wajen yin wanann siddabarun fitar da ruwa a lauje, ‘yan tauri suna nemo waɗannan hakukuwa, za a jiƙa su a cikin ruwa sai sun ɗauki lokaci mai tsawo, ta hanyar sarrafa wannan laujen, domin ya fitar da ruwa a lokacin da ake gudanar da wasar, idan an sami za a yi amfani da susun katifa a wajen yin wannan laujen, ana shimfiɗa wannan susun katifa a cikin darmar sai a game, amma maƙerin ba zai bugi inda susun katifar yake ba, sai dai gefe-gefe za a gyara shi yadda ba za a gane yadda aka sarrafa darmar ba, ana yi wa laujen belar wuta, domin ya yi baƙi yadda ba za a gane darma ce aka sarrafa aka mayar da ita lauje ba.
            Haka kuma ba za a bige ƙarshen laujen ba, saboda ana yin wata kussuwa da  ruwa za su shiga a cikin laujen, wannan kussuwar ita ce ruwan za su kama fita a lokacin da yake cewa laujen ya fitar da ruwa. Ana saka laujen a cikin ruwa sai ya sami kamar minti biyar, sai a ɗauko laujen, idan mutum ya ga dama zai sa salatib, domin rufe kussuwar kada ruwan su fita. Idan aka fara kirarin ɗan taurin sai ya ɗauko laujen ya shigo fili da shi yana faɗar lauje ka fitar da ruwa, to a wannan lokaci za a ga ruwa suna fita a lauje, kamar lauje yana karɓa umurnin da ake ba shi ne.
            Haka kuma a firar da nayi da Bello Musa Maƙeri Argungu, ya ce: A wajen yin wannan laujen za a samu ƙarfe mai kwararo a yi wa laujen ɓota da shi, kuma za a sami (pibe) na firjin a saka a tsakiyar darmar a wajen yin laujen, amma ba za a bugi tsakiyar ba saboda kada kussuwar da aka yi ta rufe, saboda a sami wajen zuba ruwa a laujen da kuma wajen fitar ruwan. Idan an tayar da ɗan tauri zai fito da laujen yana kirari, amma kan laujen yana sama, domin idan ya dubi ƙasa ko bai yi magana ba ruwan za su fito, amma da  ya buƙaci ruwan su fito zai yi magana ya kuma mayar da kan laujen ƙasa yana faɗar lauje ka fitar da ruwa ko ruwa ku tsaya; to duk wannan siddabaru ne.

Siddabarun Na Cin Kwalba
            ‘Yan tauri suna da siddabaru na cin kwalba a filin wasa da ‘yan tauri ke yi abu ne mai matuƙar burgewa, idan an tayar da su, ko an fara kirarin mutum, wannan cin kwalbar da suke yi, akwai abubuwan da suke amfani da su, domin su gusar da tunanin mutune da kuma jawo hankali masu kallo.
            A wannan siddabaru ana amfani da wani turare ne a shafa wa jikin kwalbar duka da an gama, za a sami muhun Buzaye mai suna mangal, wanda suke shayi da shi, sai a zuba gawayi a kunna wuta da zarar gawayin ya zama garwashi sai a aza kwalbar a saman wutar a ci gaba da fitara da kwalbar ta yi minti ɗaya sai a juya, domin idan an barta ta ɗauki wuta sosai to za ta waste, to da zarar an ɗauko kwalbar za goge dattin da ke gare ta na wutar, za a ga kwalbar duk ta tsage ko’ina.
            Idan ɗan tauri zai yi wasa da wannan kwalbar zai ci kwalbar a cikin jama’a da bakinsa, amma sai ya sami ban kurna da jar kanwa da kuma wani gari magani ko lungwaɓin zogala da jar kanwa da wani garin magani, zai saka su a baki yana ci ba tare da  ya haɗe ko zubar da yawun da ke cikin baƙinsa ba, zai bar yawun a bakinsa, saboda sune maganin da za su hana kwalbar ta yanka shi. Idan ya yi wannan to zai ɗauko kwalbar ya kama ɓulgutar ta kamar mai ƙallar goro, har sai ta ƙare.

Siddabarun Fitar Da Jini A Farcen Mutum 
            Wannan wani siddabaru ne da ‘yan tauri ke yi domin nuna barazana da gwaninta ga ‘yan kallo, ta hanyar fitar da jinni a yatsan mutum, amma ba tare da an yanka yatsan ba.
            A wajen haɗa wannan maganin za a sami algasa  da leda santana a zuba algasa a cikin cibiyar ledar, za a saka algasar kaɗan ba da yawa ba, sai a saka zaren tela a ɗaure ledar, ɗan taurin zai saka ta a baki, idan ya saka ta a baki za ya kai ta a gefen haƙora, wato saman dasashi ko ƙasan dasashi ya aje ta. Idan ɗan tauri yana son ya razana wani ko ya bashi tsoro to, zai mayar da ledar a cikin baki ya taune ta, da ya saka farcen mutum a bakinsa ya tsotsa, da ya fitar ya zubar da yawu za ka jini, amman ba jinni ba ne, algasar da ya saka a bakinsa ce.

Siddabarun Saka Bunsuru Kwana
            Akwai siddabarun da ‘yan tauri ke yi na saka bunsuru kwana a wajen wasar tauri, domin nuna barazana ko gwaninta har ma da ƙwarewa ga idon ‘yan kallo.
            A wajen haɗa wannan siddabaru, ana rubuta ayar wal’asar, amman ba za a fara ba sai an fara kiran sallar la’asar, a lokacin da duk ladan ya hau masallaci wajen kiran salla, to za a fara rubuta ayar kamin ya ƙare kiran salla ake son a rubuta ayar a gama, kuma idan kana rubutun ba za ka sheɗa ba, idan ka gama rubutun da  ya bushe sai ka haɗa layar da wani haki.
            Idan ɗan tauri zai yi wasa, to zai sa a kawo masa Bunsuru da bargo wanda ke iya rufe Bunsurun duka ba za a ga jikin Bunsurun a fili ba, to a wajen rufe Bunsurun ɗan taurin zai yi ƙoƙarin aza wa Bunsurun nan laya, ba tare da kowa ya gani ba, to da an rufe Bunsurun da bargo ko da layar ta faɗi ƙasa ba matsala Bunsurun zai yi kwana, idan ma yana son ka ɓadda mutane zai ɗaura layar a bargon sai a lulluba wa Bunsurun sai ka kewaya Bunsurun, kana magana a ciki, kamar kana wani siddabaru ne, amma ba sun laya ce ka ɗaura wa bargon ba, amma da an ɗauke layar to Bunsurun zai tashi.
Siddabarun Hawan Kwarya Ayi Tsaye a Samanta
            Akwai ‘yan taurin da ke yin siddabaru na hawan ƙwarya da faifai, kuma ba tare da mutum ya faɗa cikin ƙwaryar ba ko kwarya ta mutu, domin ƙara jawo hankalin ‘yan kallo da kuma burge su.
            A wannan siddabaru za a sami ƙwarya da faifan Fulani, sai a aza ƙwaryar inda babu faƙo bi ma’ana inda ke da yashi, domin ƙwaryar ta sami wajen zama mai kyau. To a wannan siddabaru za a ayi amfani da layar nan da aka yi amfani da ita wajen saka Bunsuru kwana, za a ɗauko layar a goga wa ƙwarya da faifan nan na Fulani, ba tare da ka bari kowa ya ga abin da kayi ba, za ka nuna kamar kana wata addu’a ce ko ka saka hannu a aljifu kamar kana wani abu, a wajen aje su sai ka shafa wa kowa ne layar, sai ka sake layar a aljifu.
            Idan ka gama wannan sai ka dubi mutum majiyi ƙarfi mai girma ka kira shi, da ya zo sai ka kira wani ko da ƙaramin mutum ne, ya dafa shi ya hau saman faifan ya yi tsaye a kan ƙwaryar nan, kuma ba za ta yi komai ba amma ya kasance duk faifain da za a aza saman ƙwaryar ya zamo ya fi ƙwaryar faɗi ko da kaɗan ne.
Siddabarun Cin Yuƙa
            Wannan siddabaru wata hanya ce da ‘yan tauri ke amfani da ita domin nuna barazana da burgewa ga idon ‘yan kallo.
            Wannan yuƙar da ‘yan tauri ke amfani da ita ba, ba yuƙa  ce da ƙarfe ba, sunan samun darma ta batur na mota ne su kai wa maƙera baƙin ƙarfe, su yi musu yuƙa da wannan darma ne. maƙera suna zana yuƙa ne, sai su narka darmar su zuba, idan sun yi haka za a gyara ta kamar yuƙar ƙarfe, amma su, da ke amfani da ita sun san yanda take, to da zaran an tayar da ɗan tauri zai fito da ita yana kirari daga nan zai saka yuƙar a bakinsa yana ci, kasancewar darma ce da ya fito daga filin wasa zai fitar da ita a bakinsa.
Siddabarun Fitar da Wuta a Hula
            Wannan siddabaru yana cikin manyan siddabarun da ‘yan tauri ke barazana ko nuna gwaninta tare da burge ‘yan kallo, ta hanyar fitar da wuta a hular da ke saman kansu.
            A wajen haɗa wannan ɗan tauri zai sami wani abu da ake kira mai kwalli, wato (Fatashiya) za a haɗa shi da wani turare, idan an sami waɗannan sai a zuba mai kwalli daga a saman takarda, sai a ɗan zuba turaren nan kaɗan a cibiyar leda, sai a lauye ledar yada ba zai fita ba. Daga nan za a ɗauko mai kwalli nan da aka zuba kan takarda sai a ɗauko turaren nan da aka kulla, sai a aza kan takardar sai a naɗe shi kamar laya. Idan ana son ya kama da wuta to sai lokacin da ake buƙata ya kama, amma za a kula da shi sosai saboda da zarar ya fashe to zai kama da wuta, saboda ba ya son matsuwa.
            Idan ɗan tauri zai yi amfani da shi wajen wasa to zai sami hular saƙi ta Yarabawa, za a yanka hular daga ciki inda ba wanda zai gane an yanke hular, sai a tura layun guda biyu, idan ba za a gansu ba. To da zarar ɗan tauri zai yi wasa zai aza hular a kansa, da an fara yin wasa kirari da  ya  fito a filin wasa to da  ya sa hannu ya. Matse hular bayan saƙon daga zuwa biyu za ka  ga hayaƙi ya fara tashi, sai hular ta kama da wuta. Haka kuma idan yana son abin ya ƙara almushi, za a saka tokar Bindiga a cikin haɗin, idan ta kama da wuta to abin zai fi rigima da nuna barazana.
Fitar Da Wuta Ga Adda
            Wannan ma wani siddabaru ne da ‘yan tauri ke yi domin nuna barazana da gwaninta a wajen wasar tauri.
            Kamar yadda muka yi bayanin layar da aka haɗa a wajen fitar da wuta a hula, to  a nan ma ana amfani da waɗannan abubuwa da muka faɗi ana amfanin da su. Idan ɗan tauri zai yi wasar fitar da wuta a adda za a ɗaura waɗannan layoyin guda biyu a sannan addar kasa ga ɓotar adda ya saka ledar addar ya rufe, idan ya fito a filin wasa zai sa hannunsa ya danne waɗannan layoyin da zarar ya yi sun fara zafi sai ya ɗauke hanunsa, ba da jimawa ba za ka ga addar ta kama da wuta. Idan ɗan tauri yana buƙatar karya addar to da zarar ya buga ta ga ƙasa ko wani abu, zai karya ta.


Sakamakon Bincike
          Wannan bincike mai taken: Tauri ko Barazanar Siddabaru: Nazarin Siddabarun ‘Yan tauri a a Ƙasar Kabi, ya gano cewa da yawa daga cikin ‘yan tauri suna amfani ne da siddabaru, watau dabaru da hikima domin burge masu kallo, ba tauri ne na haƙiƙanin gaskiya ba. Haka wannan bincike ya gano cewa akasarinsu sai sun shiryo abin da za su aikata a dandali daga gida. Haka ma, binciken ya gano ‘yan taurin suna amfani ‘yan kore, domin su riƙa musu kayan da za su yi amfani da su a dandali ba tare da sun masu wata matsala ba. Haka kuma, binciken ya gano wannan siddabaru da ‘yan tauri ke aiwatarwa ba zai yiyu ba, ba tare da maƙera ba.